Олий Мажлис Қонунчилик палатасининг 2 ноябрдаги мажлисида «Инсон аъзолари ва тўқималарининг трансплантацияси тўғрисида»ги қонун лойиҳаси кўриб чиқилди. Бу ҳақда депутат Расул Кушербаев хабар қилди.
Расул Кушербаевнинг маълум қилишича, эндиликда донор сифатида ўзидан аъзолари ва (ёки) тўқималарининг трансплантация учун олинишига ихтиёрий равишда, бепул асосда, нотариал тартибда тасдиқланган ёзма розилик берган инсон тушунилади.
Амалдаги таҳрирда донор-беморга трансплантация қилиш учун органлари, тўқималари ва (ёки) ҳужайраларини ўз ихтиёри билан бераётган инсон тушунилиб, у уч йилдан ортиқ никоҳда бўлган эр-хотинлар ва уларнинг олдинги турмушидан бўлган фарзандлари, тўғри ва ён тарафдан бўлган қариндошлари, шунингдек, ўгай ота, ўгай она, ўгай ўғил, ўгай қиз ва оила ҳақидаги қонун ҳужжатларига мувофиқ фарзандликка олинган болалар тирик донор бўлиши мумкин эди.
Депутатнинг айтишича, мазкур қонун лойиҳасининг қабул қилиниши аъзолар ва тўқималар трансплантациясини бажаришдаги мақсадлар ва шартларни аниқлаган ҳолда, касалланиш ва аъзолардаги қайтариб бўлмайдиган жараёнлар туфайли ўлимга олиб келувчи ҳолатларнинг қисқаришига олиб келади.
Мажлисда республика марказларида амалга ошириладиган операциялар тури 350 тага, вилоят марказларида 130, туман шифохоналарида 60 тага етгани, 32 та шифохонада эса эндоваскуляр хирургия бўлимлари ташкил этилгани қўшимча қилинган.
Мажлисда қонун лойиҳаси депутатлар томонидан учинчи ўқишда қабул қилиниб, Сенатга юборилди.
Бундан аввал Ўзбекистоннинг барча ҳудудларида 2022 йил охиригача буйрак трансплантацияси амалиёти йўлга қўйилиши ҳамда хоразмлик 33 ёшли аёл турмуш ўртоғига буйрагини бергани ҳақида хабар берилганди.
Изоҳ (0)