Ижтимоий тармоқларда Оналик ва болаликни муҳофаза қилиш бошқармаси бошлиғи Марат Содиқовнинг соғлиқни сақлаш вазири Абдуҳаким Хожибоевга ёзган хати тарқалди, деб хабар беради «Gazeta.uz».
Унда бошқарма бошлиғи 17 май куни Тошкент вилоятидаги кўп тармоқли поликлиникада туғуруқнинг эртаси куни 1998 йилда туғилган аёл вафот этганини маълум қилган. Ташхис сифатида ўткир юрак-томир етишмовчилиги, ўткир буйрак-жигар етишмовчилиги, ДВС синдром гипокоагуляция босқичи, ошқозон-ичакдан қон кетиши кўрсатилган.
Шунингдек, таъкидланишича, мурда экспертиза текширувига юборилган.
Бундан ташқари, хатга вазир ўринбосари Элмира Боситхонова ҳам имзо чеккан. Унда «вазирга киритилмасин» ёзувини, шунингдек, бош акушер-гинеколог икки нафар профессор орқали хулоса бериши кераклиги ёзилган. Охирига «сабабсиз ўлим» дея ёзилган.
Соғлиқни сақлаш вазири ўринбосари Тошкент вилоятидаги поликлиникада ростдан ҳам шу каби ҳолат содир бўлганини тасдиқлаган. У хатга жавоби «нотўғри талқин қилинганини» маълум қилган.
«Бошқарма бошлиғи томонидан берилган маълумотни соғлиқни сақлаш вазирига чуқур ўрганиб, сабаблар ва таҳлиллар асосида киритиш лозим. Масала оналар ва болалар ўлими ҳақида кетар экан, юзаки хулосаларга таянмасдан чуқур ўрганиш керак. Бу ўрганиш ишларини бош акушер-гинеколог билан бирга икки профессор олиб бориши кераклиги ҳақида топшириқ берилган. Ўлим сабаблари чуқур ўрганилиб, кейин вазирга ҳисобот бериш кераклиги назарда тутилган», — дея унинг сўзларини келтиради «Kun.uz».
«Гўдаклар ва оналар ўлими билан боғлиқ ҳар бир ҳолат бекитиладиган нарса эмас. Қонунда ҳам, тиббиётда ҳам ҳар бир ўлим ҳолати сабаблари таҳлил қилиниб, чора кўрилади ва бу кейин юзага келиши мумкин бўлган муаммоларга ечим бўлиб хизмат қилади. Шунинг учун ҳам бу ҳолни бекитиш ёки ‘ёпди-ёпди’ қилишдан бирор инсон манфаатдор эмас», — дейди Боситхонова.
Вазир ўринбосари хатда «критик» сўзи ёзилганини алоҳида қайд этган.
«Бу ёзувни қайд этишдан мақсад ниманидир хаспўшлаш ёки бекитиш эмас. Бундай нотўғри хулосалар қилиш бу вазиятни нотўғри талқин қилиш деб ўйлайман», — дейди Боситхонова.
Унинг сўзларига кўра, ўлим сабаблари чуқур ўрганилган, хулосалар олинган ва айбдор шахслар ўз жазосини олган. «Инсон ҳаёти билан боғлиқ бундай ҳолатлар қайта содир бўлишининг олдини олиш мақсадида бу тиббий таҳлил бутун республикадаги туғруқ комплексларига кўрсатма хати билан биргаликда етказилган», — дейди соғлиқни сақлаш вазири ўринбосари.
Изоҳ (0)