Қашқадарё вилояти Қарши туман Ободонлаштириш бошқармаси бошлиғи синглиси раҳбарлигидаги фермер хўжалигига гул кўчати буюртма қилиш баҳонасида 149 миллион сўм пул ўтказиб, ўзлаштиргани маълум бўлди. Бу ҳақда Коррупцияга қарши курашиш агентлиги масъули Шодиёр Аҳмедов маълум қилди, дея хабар берди «Дарё» мухбири.
«Қарши туман Ободонлаштириш бошқармаси бошлиғи ўзининг туғишган синглиси номига ташкил этилган фермер хўжалигига 149 миллион сўмлик гул кўчатларини буюртма қилган. Аммо мазкур фермер хўжалиги ўрганилганда гул кўчати етиштиришга мўлжалланмагани, қолаверса, бор-йўғи бир нафар ишчиси борлиги аниқланган. Масъуллар эса сохта ҳужжат билан фермер хўжалигига пул ўтказган. Энг ёмони масъул идора вакиллари — Молия ҳамда ғазначилик органлари қариндош-уруғлар ўртасида шартнома имзоланганига эътибор ҳам бермаган. Шу сабаб бу ҳолатга прокуратура эътиборини қаратдик. Айни кунда ҳолат бўйича Қарши туман прокуратураси томонидан жиноят иши қўзғатилган», — дейди Коррупцияга қарши курашиш егентлиги масъули Шодиёр Аҳмедов.
Шунингдек, Шодиёр Аҳмедовнинг маълумот беришича, Қарши шаҳар ободонлаштириш бошқармаси масъуллари томонидан саккизта ҳолатда салкам 3,6 миллиард сўмлик, мактабгача таълим тизимида 537 миллион сўмлик, автомобиль йўллари бошқармасида 561 миллион сўмлик, Нишон туман Ободонлаштириш бошқармасида 975 миллион сўмлик камомадларга йўл қўйилган.
«Бу рўйхатни узоқ давом эттириш мумкин. Масалан Шаҳрисабз туман ҳокимлигида, Миришкор, Қамаши туман Ободонлаштириш бошқармаларида, Қамаши туман ҳокимлиги-ю, Миришкор туман Маҳалла ва оилани қўллаб-қувватлаш бўлимида, Халқ таълими тизими ҳамда вилоят телевидениесида давлат харидлари тўғрисидаги қонунлар қўпол равишда бузилган», — дейди Коррупцияга қарши курашиш агентлиги масъули.
Масъулнинг таъкидлашича, Шаҳрисабз туманида 553 миллион сўмлик кутубхона қурилиши бўйича талабгорлар учун танлов эълон қилинган ва эълон муддати тугамасдан туриб, қурилиш ишлари бошлаб юборилгани, ҳатто ишлар 45 фоизга битгани маълум бўлган.
Аввалроқ Қашқадарёда икки йилда мансабдорларнинг 274 нафари маъмурий, 217 нафари эса жиноий жавобгарликка тортилгани, Ўзбекистондаги боғчаларда 9 ойда 6,6 млрд сўмлик иш ҳақи ва товарлар ўзлаштириб юборилгани, Ўзбекистон Экология қўмитаси ва унинг таркибидаги ташкилотлар 9,4 млрд сўмлик маблағни ноқонуний сарфлагани тўғрисида хабар берилганди.
Изоҳ (0)