АҚШдаги хусусий Global Firepower ташкилоти анъанавий равишда ҳар йили эълон қилинадиган дунёнинг энг кучли армиялари рўйхатини эълон қилди. Унда Ўзбекистон позицияси ўзгаришсиз қолган —140 та давлат орасида 51-ўрин.
Рейтингга кўра, Ўзбекистон армияси 70 минг ҳарбий хизматчидан иборат бўлиб, унинг таркибида 194 та ҳаво техникаси, 420 та танк, 98 та ёппасига ўқ узиш тизимлари, 1,2 минг зирҳли техника, 60 та артиллерия қуроли мавжуд.
Портал маълумотларига кўра, 2021 йилги рейтингда биринчи ўринда АҚШ армияси, кейинги ўринларда Россия ва Хитой жой олган.
Марказий Осиё мамлакатлари бўйича Ўзбекистон биринчи ўринни эгаллаган. Қозоғистон — 61, Афғонистон — 75, Туркманистон — 86, Қирғизистон — 93, Тожикистон — 99-ўринда.
Global Firepower рейтинги 55 та кўрсаткич инобатга олинган ҳолда тузилади. Рейтингни тузишда географик омиллар, табиий захиралар, молиявий барқарорлик ва маҳаллий саноатнинг ривожлангани ҳам аҳамиятга эга. Армиялар қудратлилигини баҳолашда ядро қуроли борлиги, денгизга чиқишга эга бўлмаган давлатларда флот йўқлиги ҳисобга олинмайди.
Аввалроқ ўзбекистонлик ҳарбийлар Британияда ўтказилган «Кембрия патрули» мусобақасида 2-ўринни эгаллагани, Ўзбекистон жамоаси «АрМИ-2021» халқаро армия ўйинлари якуни бўйича умумжамоа ҳисобида 2-ўринни эгаллагани тўғрисида хабар берилганди.
Изоҳ (0)