Вазирлар Маҳкамасининг қарори асосида Бандлик ва меҳнат муносабатлари вазирлиги ҳузуридаги Меҳнат бозори тадқиқотлари институти томонидан 2021 йил 1 ноябрдан меҳнат миграциясида талаб юқори бўлган касблар тўғрисида ягона маълумотлар базаси шакллантирилади. Бу ҳақда Ташқи меҳнат миграцияси агентлиги хабар берди.
Шунингдек, қарорга кўра, малакали кадрларга бўлган эҳтиёжни баҳоловчи тизим ҳамда касбий стандартларни ва мустақил малака баҳолашнинг маълумотлар базаси яратилади.
Бундан ташқари, қарор билан 2021 йил 31 декабрга қадар замонавий бозор иқтисодиёти талабларига жавоб берадиган Ўзбекистонда меҳнатни меъёрлаш концепциясини ишлаб чиқиш вазифаси қўйилган. Меҳнат институти 2021 йил 31 декабрга қадар қуйидагиларни назарда тутувчи Касбий малака ва билимларни ривожлантириш тизимининг стратегик механизмини шакллантиришга доир амалий чора-тадбирлар ишлаб чиқиши белгиланган:
- касбий малака ва билимларни ривожлантириш тизими мониторингини амалга ошириш кўрсаткичлари тизими ва методикасини тасдиқлаш;
- касбий малака ва билимларни ривожлантириш тизимининг ҳолати ва ривожланиши мониторингини амалга ошириш;
- касбий малака ва билимларни ривожлантириш тизими экспертлари реестрини тузиш;
- касбий фаолиятнинг тармоқлараро турлари бўйича тармоқ кенгашларининг ўзаро ҳамкорлиги тартибини ишлаб чиқиш;
- давлат органлари ва ташкилотларининг касбий малака билимларини ривожлантириш тизимини ҳудудий меҳнат ва таълим бозорлари даражасида жорий қилиш ва такомиллаштириш бўйича фаолиятини баҳолашнинг кўрсаткич ва индикаторлари рўйхатини шакллантириш.
Изоҳ (0)