Терининг тиниқ ва таранг бўлиши, шунингдек, ажин тушишининг олдини олиш учун рациондаги маҳсулотларга эътиборли бўлиш муҳим саналади.
Балиқ ва ўсимлик ёғи
Эрта ажин тушишини истамайдиганларнинг ратционида омега-3 ва омега-6 ёғ кислотасига бой маҳсулотлар бўлиши керак. Ҳафтада бир марта балиқнинг исталган турини истеъмол қилишни канда қилмаслик керак. Шунингдек, қовоқ уруғи, исмалоқ, ўсимлик ёғи сингари маҳсулотлар ҳам фойдали эканини унутмаслик керак.
Ёнғоқ
Коэнзим Q10 ва E витамини ҳужайраларнинг регенерацияси ва озиқланиши учун муҳим саналади. Шу сабаб ҳам қаришга қарши воситаларни тайёрлашда айнан ушбу моддалардан фойдаланилади. Ажинлар тушишининг олдини олиш учун крем суртишдан ташқари, ёнғоқларни истеъмол қилиш ҳам яхши самара беради. Мутахассислар коэнзим Қ10 ва E витаминининг кони бўлган ушбу маҳсулот ёшликни сақлашда жуда ҳам муҳим эканини таъкидлайди. Аммо калорияга бой экани сабаб меъёрни билиш муҳим саналади. Юз терисининг гўзал бўлиши учун ҳафтада уч марта 50 граммдан бодом, ёнғоқ ва фундук истеъмол қилиш керак.
Кўкатлар ва цитрус мевалар
Коллаген тери ҳужайраларини синтезлайдиган, унинг эластиклиги ва таранглиги учун жавоб берадиган оқсилдир. Ёш ўтиши билан тери таранглигини сақлаш осон бўлмайди. Ажинлар кўпаймаслиги учун коллаген қанча кўп бўлса, шунча яхши. C витамини эса унинг ишлаб чиқарилишини таъминлайдиган энг яхши рағбатлантирувчи восита ҳисобланади. Шу сабаб ҳам C витаминининг кони бўлган киви, наъматак, қизил булғори қалампири ва петрушка истеъмол қилишни канда қилмаслик керак.
Қизил ва оловранг мевалар
Юз териси сўлғин кўринмаслиги учун кўпроқ қизил ва оловранг мевалар истеъмол қилиш керак. Сабзи, булғори қалампири, помидор, қовоқ ва ўрик сингари маҳсулотлар тери ҳужайраларининг янгиланиши учун жавоб берадиган антиоксидант — бета каротиннинг кони саналади. Қолаверса, қаришга қарши аксарият кремлар таркибида ретинол — организмда каротин сабаб ишлаб чиқариладиган А витамини бисёр бўлади.
Изоҳ (0)