Шеллак қилдиришни яхши кўрадиган аёл ва қизлар қопламани қуритиш давомидаги ультрабинафша нурлари турли касалликларга олиб келиши мумкинлигини ёдда тутиши зарур.
Шеллак нима ўзи?
Шеллак — узоқ вақт давомида тирноқлари мукаммал қопланиб туришини истовчилар учун энг яхши лак муқобили ҳисобланади. Тирноқларни қоплаш жараёнида лак ва гелдан фойдаланилади. Шеллак тирноқларда 3 ҳафта давомида ўзгаришсиз туриши мумкин. Асосан, салонларда амалга ошириладиган жараёнда дастлаб тирноқ пластинкалари тозалаб олинади, кейин ёғсизлантирилиб, базавий қоплама суртилади. Ундан сўнг рангли лакдан фойдаланилади.
Шеллакнинг оддий лакдан фарқи — ҳар бир суртилган қават бир неча дақиқа давомида ультрабинафша лампа нурлари билан қуритилади. Қуритилгани ҳисобига шеллак жараён тугагунича қотиб бўлади. Одатда шеллак билан қоплашга 15 дақиқага яқин вақт кетади. Уни ўчириш учун эса мутахассисга мурожаат қилган яхши. Ацетонни ўзи билан ўчириб бўлмайди. Тирноқларни ацетон шимдирилган пахтали дискларга, кейин фольга қоғози билан 10 дақиқага ўраб қўйилса, иш бериши мумкин. Аммо бунда тирноқларнинг қуритиб юбориш эҳтимоли катта. Салонларда эса махсус, тирноқларга шикаст етказилмайдиган усуллардан фойдаланишга ҳаракат қилинади. Ҳиди ва таркибида толуола, дибутилфталан, формалдегид йўқлиги ҳисобига шеллак гипоаллерген қоплама ҳисобланади.
Нимаси хавфли?
Шеллак тирноқ пластинкасига салбий таъсир қилиши, қолаверса, шикастлаши ҳам мумкин. Тирноқлар ўзига келиб олиши учун эса 2 ой давомида шеллакциз юриш кифоя. Бошқа хавфи эса қуритиш жараёнида ишлатиладиган ультрабинафша нурлар билан боғлиқ. Айрим олимлар ультрабинафша нурли лампаларнинг саломатлик учун зарарли эканини таъкидлайди. Бундай қарорга Американинг тери саратони билан боғлиқ муаммоларни ўрганувчи ташкилот мутахассислари келган. Тадқиқотларда салондаги анжомлар кансероген таъсир кўрсатиши мумкинлигини аниқлаган
Қандай ҳимояланиш мумкин?
Шеллак қилдириш орасида вақт бўлсин, 1,5-2 ой энг яхши муддат. Бу вақтда парваришлайдиган қопламалардан фойдаланилса, янада яхши. Лампанинг зараридан максимал даражада ҳимояланиш учун мутахассислар шеллакдан аввал SPF крем қўллашни тавсия қилади. Тирноқ учун восита ва маҳсулотлар ишлаб чиқарадиган CND’нинг расмий мурожаатида шеллак ҳақида шундай дейилади:
«Мижозлар ва профессионал салон ходимлари CND маҳсулотларини 30 йилдан кўпроқ вақтдан буён муваффақиятли ишлатиб келмоқда. CND’га қарашли бўлган тирноқлар учун узоқ турадиган шеллак қопламаси 2010 йилда чиқарилган бўлиб, гел-лаклар категориясида биринчи ҳисобланади ва ўзига хос хусусиятлари билан фарқ қилади».
Компаниянинг маълумотига кўра, гел лак учун ультрабинафша нурли лампалардан фойдаланилганида нурланиш соғлиққа хавф соладиган даражада бўлмайди. Нурланишдан хавотирда бўлганларга эса тери саратонига қарши курашиш фонди ультрабинафша нурларига қўлларни қўйиб қуритишдан 20 дақиқа аввал қуёш нурларидан ҳимоя қилувчи SPF-крем суртишни тавсия қилади.
Изоҳ (0)