«Голливуддаги энг қайғули йигит» ва «Энг машҳур саргардон» номини олган Киану Ривзнинг ҳаётида рўй берган кўнгилсизликлар унга тамоман кулишни унуттирди. Аммо йиллар ўтиб, яна табассум қилишни ўргатган инсон кимлиги ҳақидаги қизиқарли ҳикояни эътиборингизга ҳавола этамиз.
«Тоғ чўққиларидан совуқ шамол»
Киану 1964 йилда Ливанда туғилган. Гавайи тилидан таржима қилинганда «тоғ чўққиларидан совуқ шамол» деган маънони англатувчи «Киану» исмини унга гавайилик отаси қўйган. Афсуски, бу унинг ўғлига қолдирган ягона нарсаси эди. Киану уч ёшга тўлганида ота-онаси ажрашиб кетган. Онаси Патрисия ёшлигида раққоса бўлган, кейин либослар дизайнери сифатида фаолият юритган. У интервьюсида ҳеч қачон ўзини намунали она деб ҳисобламаслигини, ўғли ва қизининг улғайишини шунчаки кузатаётганини ҳам яширмаган. Иккинчи турмуш ўртоғи кинорежиссёр Пол Аарон унинг бутун оиласини ўз ватани – Канадага кўчириб кетган.
Дислексия ва хоккей
Киану улғайди, мактабга борди ва у ерда тўсатдан дислексия деб аталадиган муаммога дуч келди. У беш йил ичида тўртта мактабни ўзгартирди. Чунки ўқитувчилар унинг ўзига хослигини тан олишни хоҳламади, уларнинг талаби ҳамма каби бўлиш эди. Шикоятлар ва муваффақиятсизликлар ёш Киануни синдира олмади: у хоккейга қизиқа бошлади. Муз устида чаққон, кучли, тез ҳаракат қиларди. Аммо бир куни у жароҳат олди ва клуб билан хайрлашишга мажбур бўлди.
Мактабни ташлаб
Бироқ ўша пайтга келиб, Киану бошқа севимли машғулот топганди: у ҳаваскорлар театрида ўйнай бошлади. 15 ёшида «Ромео ва Жулетта» да Меркуцио ролини ўйнаб, ўзининг маҳоратини намоён қилди. Бу орада мактабдаги дарслар ҳали ҳам яхши эмасди ва бир куни Киану актёр бўлиш орзусида ўқишни ташлаб кетди. Ва бу мақсад йўлида шунчаки юрмади: қаерда бўлса ҳам пул топишга ҳаракат қилди. У ресторанда ишлади – спагетти тайёрлади. Дарахтларни кесди ва майсазорларни текислади. Спорт дўконида конкиларни чархлади. ... Ва, албатта, севиб ҳам қолди.
Женнифер Сайм ва Киану Ривз: икки карра фожиа
Тасодифий ва бахтли романтика. Бу вақтга келиб, Киану аллақачон бир нечта муваффақиятли фильмларда роль ўйнаган эди: унга ўгай режиссёр отаси илк ролларида ёрдам берди. Датлабки роллардан сўнг «Ота-оналар», «Менинг шахсий Айдаҳо штатим», «Дракула» каби фильмларида суратга тушди. Женнифер ҳам кино оламига киришга уриниб кўрди, лекин бу бошқа ҳикоя эди.
Режиссёр Дэвид Линчнинг ёрдамчиси Женнифер Кианунинг эътиборини тортди. Чунки унинг хатти-ҳаракатлари, одатдаги актрисаларнинг интилишидан фарқ қиларди. У қизга ғамхўрлик қила бошлади, уларнинг муносабатлари жуда тез ривожланди ва иккаласи ҳам шунчалик бахтли кўринганидан атрофдагилар бунга шубҳа қилмади. Улар Голливуддаги энг чиройли жуфтликлардан бири айланганди. Жуфтлик биргаликда яшашни бошлади ва тез орада Женнифер фарзанд кута бошлади. Улар туғилажак қизига ўйингоҳ қурди, исм танлади...
Аммо туғруқ жараёнига бир ой қолганда она қорнидаги жажжи юрак уришдан тўхтади. Жуфтлик учун мусибатга сабр қилиш қийин кечди: уларда фақат орзуларининг парчасигина қолганди. Киану ва Женнифер ушбу фожиадан кейин ўзига кела олмади. Уларнинг биргаликда яшаши барчасини қайта ёдга солаверди ва шунинг учун ҳам ажрашишга қарор қилди. Орадан бир йил ўтиб Женнифер ҳам ғойиб бўлди. У руҳий тушкунлик билан курашишга уриниб, спиртли ичимликларга ружу қўйди ва маст ҳолатида машина бошқариб, автоҳалокатга учради.
Синглиси билан саратонга қарши кураш
Бу Киануни кутган сўнгги синов эмасди. Ўз синглиси Кимнинг лейкемия эканини билгач яна фаол ҳаракат қила бошлади. Энг яхши шифокорларни топди, керакли дори-дармонларни олди, синглиси билан доим бирга бўлди, фильмларда суратга тушишни тўхтатди. Актёр синглисининг севимли таомларини ҳам тайёрлади. Қувноқ мусиқага рақс тушиб, ҳолдан тойган синглисини қучоқлар, ҳеч бўлмаганда унинг юзига табассум олиб келарди. Шундан сўнг касаллик бироз орқага чекинди. Ким соғайиб кетгач, актёр онкологияга қарши жиддий уруш эълон қилди: у дори-дармонларни ишлаб чиқаришга катта маблағ ажратди ва саратон билан касалланганлар учун фонд ташкил қилди.
Клер Форлани билан муносабатлар
Бир муддат актриса Клер Форлани Кианунинг ҳамроҳига айланди. У ўша пайтда уй сотиб олишни хоҳламаслиги ва арзон меҳмонхонада ёки ижарада яшаш одати билан барчани ҳайратда қолдирганди. Киану Клер билан учрашишни бошлагач барибир уй сотиб олди: миш-мишларга кўра, актёр буни актрисанинг таъсири остида қилган. Атрофдагилар эса тўй ҳақидаги хабарни кутарди. Лекин бу ҳақда ҳеч қандай гап бўлмаган. Қолаверса, жуфтлик бирданига ҳеч кимга ҳеч нарсани тушунтирмасдан ажрашди. Киану журналистларнинг барча саволларига хотиржамлик билан «Клер иккимиз шунчаки дўстмиз» деб жавоб берди.
«Ғамгин Киану»
Шундан сўнг актёр яна ёлғзиликда кўпроқ вақт ўтказди, кўча ва хиёбонларда сарсон кезди, ўриндиқларда узоқ вақт хаёл сурди, ҳатто кабутарларни овқатлантирганда ёки яқин атрофда ўйнаётган бола билан суҳбатлашганда ҳам юзини ғамгинлик тарк этмасди. Унинг кийимлари беўхшов, соч-соқолига узоқ вақт қайчи тегмаганлигидан қисқа вақт ичида худди уйи йўқ инсонга ўхшаб қолганди. Қариндошлари Кианунинг аҳволидан хавотирда эди: афтидан, у фожиали воқеалардан кейин ўзига кела олмаган, унинг ичида қора тубсизлик пайдо бўлганди. Шундай бўлганда ҳам у ҳаракат қилишни давом эттирди, лекин каттагина пулдан иборат гонорарини уй, машина ва заргарлик буюмларига эмас, балки хайрия ва ҳадяларга сарфлади. Масалан, афсонавий «Матрица» фильмини суратга олиш учун олинган барча пулларни актёр визажист, компьютер техниклари ва кадр ортидаги бошқа «меҳнаткашларга» тақсимлаб берди. Шунингдек, ҳар бир каскадёр Кианудан совға тариқасида ҳашаматли велосипедлар олди.
Александра Грант: қалбан яқин инсон
Ўша пайтда Киану шеър ёзишни бошлади. Шеъриятга бўлган муҳаббат асосида у 2009 йилда учрашган рассом Александра Грант билан яқинлашди. Ривзнинг шеърлари Александрани расм ва ҳайкаллар яратишга илҳомлантирди: у актёрни чинакамига ноёб совға билан тақдирлаган ҳақиқий даҳо деб билди. Актёр ҳам Александранинг ўзини унутиб, ижодкорликка тўлиқ таслим бўлиш қобилиятидан ҳайратда қолди. Бир мунча вақт ўтгач, дўстлар буни пайқади: чунки Киану Ривз яна табассум қилаётган эди. Кўринишидан, Александра Грант Ривзнинг ҳаётга бўлган қизиқишини тиклашга муваффақ бўлган. Бироқ, баъзи мухлислар аёлнинг ташқи қиёфасидан ҳайратга тушди: Александра машҳур актёрнинг яқин инсони сифатида одатий қиёфага мос эмасди, у оқарган сочларини яширмас ва ёш кўринишга ҳаракат ҳам қилмасди. Бундан ташқари, у Кианудан катта кўринса-да, аслида унинг ёши актёрникидан тўққиз ёш кичик эди! Нима бўлганда ҳам Киану унинг ёнида хотиржам ва осойишта кўринади. Бир марта у интервьюсида, у турмуш ўртоғи бўладиган аёл билан уйғун муносабатни орзу қилганини тан олди. Кўриниб турибдики, коинот унинг хоҳишини эшитган ва Александрани юборган.
Изоҳ (0)