Дональд Трампнинг ўғли суратга олиш майдончасидаги фожиадан кейин «Қурол одамларни ўлдирмайди, уларни Алек Болдуин ўлдиради» ёзуви туширилган кийимларни сотувга чиқарди

АҚШнинг 45-президенти Дональд Трампнинг 45 яшар ўғли кичик Дональд Трамп футболка, свицҳот ва худилар ишлаб чиқара бошлади. Кийимларга «Guns don’t kill people, Alec Baldwin kills people» (Қуроллар одамларни ўлдирмайди, Алек Болдуин одамларни ўлдиради) деб ёзилган. Бу ҳақда Esquire хабар беради.

Футболкалар Алек Болдуин «Занг» («Rust») фильмини суратга олиш майдончасида реквизит қурол билан оператор Галина Хатчинсни тўсатдан отиб қўйганидан бир неча кун ўтиб сотувга чиқарилган.

Маълум қилинишича, бундай ёзувли футболкаларни 28 доллар, худини 40 долларга, свицҳотни эса 45 доллар эвазига харид қилса бўлади. Кичик Дональд Трамп, шунингдек, ўзининг Telegram-каналида Болдуиннинг сотувдаги футболкани кийиб тургани фотошоп қилинган сурати билан ҳам бўлишган.

Собиқ президентнинг ўғли, қолаверса, Instagram’даги постларидан бирида нима учун Миллий мерганлик ассоциацияси (National Riffle Association, NRA)га қарши чиққан Болдуин қурол ортидан пул топишни истагани (қурол ишлатиладиган фильмнинг суратга олиш ишларида қатнашгани) ва ундан хавфсиз фойдаланиш асосларини ўрганмагани масаласига тўхталган.

Унинг тарафкашлари ва Болдуинни айбдор деб ҳисоблаганлар #AlecForPrison (Алек қамоққа олинсин) хештеги билан пост жойлаган. Хусусан, республикачилардан бўлган Кендис Оуэнс Twitter саҳифасида актёрнинг Трамп ва уни қўллаб-қувватлайдиганлар ҳақидаги барча сўзлари ҳам ҳақиқатга тўғри келмаслигини ёзиб қолдирган.

Трамп тарафкашларининг Болдуин билан боғлиқ вазиятга бунчалик эътибор бериши бежизга эмас. Бу актёрнинг бундан бир неча йил аввал Saturday Night Live шоусида АҚШнинг 45-президенти Дональд Трампни пародия қилгани билан боғлиқ.

Трампнинг ўзи ҳам шоу ҳақида салбий фикр билдирган бўлиб, президентни «даҳшатли» пародия қилиш ортидан Болдуин ўзининг «ўлаётган ўртамиёна карьерасини» сақлаб қолганини таъкидлаган.