25 октябрь куни Ўзбекистонга Pfizer/BioNTech вакцинасининг 273 780 дозалик яна бир партияси олиб келинади. Бу ҳақда Ўзбекистоннинг Вашингтондаги элчиси Жавлон Ваҳабовга таяниб, Telegram’даги «Вакцинауз» канали хабар берди.
Таъкидланишича, 273 780 доза Pfizer вакцинаси АҚШ ҳукумати хайрияси сифатида Кентукки штатидан тўғридан-тўғри юборилади.
Эслатиб ўтамиз, 13 сентябрь куни Ўзбекистонга 1,2 миллион дозадан ортиқ Pfizer вакцинаси келтирилган эди. 18 октябрь куни яна 526,5 минг доза Pfizer вакцинаси олиб келинганди. Июль ойининг охиридан то ҳозирги кунга қадар АҚШ Ўзбекистонга 5 миллион доза вакцина юборган.
«Америкада ишлаб чиқарилган вакциналар Ўзбекистонда қўлланилаётганлар орасида иккинчи ўринда туради», — дейилади хабарда.
Маълумот учун, мамлакатда ота-оналар ва васийларининг розилиги асосида ихтиёрий равишда 12 ёшдан катта болаларни ҳам Pfizer/BioNTech вакцинаси билан эмлашга рухсат берилган. 25 октябрь ҳолатига кўра, Ўзбекистонда аҳолининг 17 фоизи тўлиқ, яна 21 фоизи қисман эмланган.
Изоҳ (0)