25-oktabr kuni O‘zbekistonga Pfizer/BioNTech vaksinasining 273 780 dozalik yana bir partiyasi olib kelinadi. Bu haqda O‘zbekistonning Vashingtondagi elchisi Javlon Vahabovga tayanib, Telegram’dagi “Vaksinauz” kanali xabar berdi.
Ta’kidlanishicha, 273 780 doza Pfizer vaksinasi AQSh hukumati xayriyasi sifatida Kentukki shtatidan to‘g‘ridan to‘g‘ri yuboriladi.
Eslatib o‘tamiz, 13-sentabr kuni O‘zbekistonga 1,2 million dozadan ortiq Pfizer vaksinasi keltirilgan edi. 18-oktabr kuni yana 526,5 ming doza Pfizer vaksinasi olib kelingandi. Iyul oyining oxiridan to hozirgi kunga qadar AQSh O‘zbekistonga 5 million doza vaksina yuborgan.
“Amerikada ishlab chiqarilgan vaksinalar O‘zbekistonda qo‘llanilayotganlar orasida ikkinchi o‘rinda turadi”, — deyiladi xabarda.
Ma’lumot uchun, mamlakatda ota-onalar va vasiylarining roziligi asosida ixtiyoriy ravishda 12 yoshdan katta bolalarni ham Pfizer/BioNTech vaksinasi bilan emlashga ruxsat berilgan. 25-oktabr holatiga ko‘ra, O‘zbekistonda aholining 17 foizi to‘liq, yana 21 foizi qisman emlangan.
Izoh (0)