Ошқозон-ичак трактлари билан боғлиқ муаммолар танадаги бошқа аъзолар касалликларига нисбатан кўп тарқалган. Нотўғри турмуш тарзи, зарарли овқатланиш ва бошқа салбий одатлар сабаб кузатилиши ҳамда куз ва баҳор мавсумида авж олиши ҳеч кимга сир бўлмаган муаммоларнинг олдини олиш учун рационга қандай маҳсулотларни киритиш кераклиги ҳақида гастроэнтеролог-шифокор Вера Сухова маълумот бериб ўтади.
Сув
Сутка давомида 6-8 стакан суюқлик ичишни канда қилмаслик керак. Исталган ичимлик истеъмол қилса бўлади, лекин шакарсиз оддий сув яхшироқ самара беради.
Олма
Бир кунда ўртача катталикдаги бир дона олма ейиш кифоя. Бу ичакларнинг меъёрий фаолияти учун клетчатка ҳисобланади, шу билан бирга, А, С, В1, В2 РР витаминларининг ҳам кони саналади. Таркибида E витамин, темир, ёд, кальций, рух, магний борлиги ҳисобига юрак-қон томир касалликларининг келиб чиқишининг олдини олади. Холестеринни камайтириб, асаб тизимига ижобий таъсир қилади. Қон айланишини яхшилаб, ҳазм жараёни учун муҳим саналган ошқозон суюқлиги ҳамда сафронинг ишлаб чиқарилишини яхшилайди.
Анжир
Барра ҳолида, айниқса, фойдали саналган ушбу мева ичакларнинг меъёрий фаолиятида муҳим саналган қўшимча клетчатка манбаи экани билан ўзига хосдир. Витамин ва антиоксидантларнинг кони экани ҳисобига саратон касалликларининг келиб чиқиш хавфини камайтиради. Антибактериал ва замбуруғларга қарши таъсирга эга ҳисобланади. Аммо қандли диабети ва аллергияси борларга ушбу маҳсулотни истеъмол қилиш борасида эҳтиёт бўлиш тавсия қилинади.
Лавлаги
Ушбу сабзавот ошқозон-ичак тракти учун зарур бўлган клетчатка ва ичаклардаги бактерияларни меъёрлаштириб, шиллиқ қаватдаги яллиғланишларни бартараф қиладиган пектинга бой саналади. Бундан ташқари, ушбу маҳсулот фолий кислотаси, марганес, магний, темир, органик кислота, C ва B6 витаминларининг кони ҳамдир. Аммо шакар мўл-кўл экани ҳисобига қандли диабет, буйрак касалликлари ва остеопороздан азият чекадиган кишиларга истеъмол борасида эҳтиёткор бўлиш тавсия қилинади.
Салат барги
Салат баргида ҳазм жараёни ва ичаклар фаолиятини яхшилайдиган клетчатка мужассам бўлади. Таркибидаги алкалоидлар қондаги холестеринни камайтиради. Микроэлемент ва витаминлар бисёрлиги сабаб тери аҳволи ва кўриш қобилияти яхшиланишига ҳисса қўшади. Альцгеймер касаллигининг олдини олади. Сийдик йўлларида тош бўлган, подагра ва колитдан азият чекадиган беморларга эса тийилиш тавсия қилинади.
Майиз
Майизда B гуруҳи витаминлари, аскорбин кислотаси, Е, К, РР витаминлари, кальций, темир, рух, магний ва натрий сероб бўлади. Шунинг ҳисобига асаб тизимига ижобий таъсир қилиб, жигар ва ичакларни тозалайди, иммунитетни мустаҳкамлайди. Мия фаолиятини яхшилаб, тишлар, тирноқ ва сочларнинг мустаҳкам бўлишини таъминлайди. Аммо ошқозон-ичак трактида муаммо бўлган беморларга ушбу маҳсулотни истеъмол қилиш тавсия қилинмайди.
Сули ёрмаси
Ушбу маҳсулотнинг истеъмолидан кейин ичаклар фаолияти меъёрлашиб, ҳазм жараёни яхшиланади. Ошқозони овқатдан кейин оғир бўладиган беморлар учун айни муддао ҳисобланади. Қолаверса, микроэлементлар бисёрлиги сабаб қон айланиши, моддалар алмашинуви, тери аҳволини яхшилайди. Табиий антидепрессант ҳисобланган ушбу ёрма бошқа маҳсулотлар билан ҳам яхши умумлашади.
Олхўри қоқи
Кунига 2-3 дона ейиш тавсия қилинадиган олхўри қоқида клетчатка, пектин, минерал ва витаминлардан ташқари, витамин, аминокислоталар, глюкоза мужассам бўлади. Мавсумий авитаминозда айни муддао ҳисобланган ушбу маҳсулот ичакларни тозалаши билан ўзига хос саналади. B гуруҳи витаминлари бош мия фаолиятини яхшилаб, депрессиядан қутулишга ҳисса қўшади. Қон-томирлар девори ва суякларни мустаҳкамлайди. Ошқозон-ичак трактида муаммо бўлганлар учун энг яхши вариант ҳисобланган олхўри қоқидан чақалоғи бор оналар, қандли диабет ва колитдан азият чекадиган беморларга тийилиш тавсия қилинади.
Изоҳ (0)