Perseverance marsoxodi o‘z missiyasi doirasida birinchi marta Mars yuzasidan tuproq namunasini oldi. Bu haqda NASA (AQSh aeronavtika va kosmik makonni tadqiq qilish milliy boshqarmasi) xabar bermoqda, deb yozadi “Interfaks”.

Perseverance marsoxodi

Foto: Global Look Press

“1-sentabr kuni Perseverance marsoxodidan olingan ma’lumotlar shuni ko‘rsatmoqdaki, mutaxassislar Marsdan muvaffaqiyatli tarzda tuproq namunasini olishga muvaffaq bo‘ldi. Yerga uzatilgan ilk tasvirlar namuna olinganidan keyin zaxiraga joylashtirilganini ko‘rsatmoqda”, — deyiladi NASA xabarida.

Shu bilan birga, qayd etilishicha, yorug‘lik yetarli bo‘lmagani sababli suratlar xira chiqqan. Missiya muvaffaqiyatli bo‘lganiga to‘la ishonch hosil qilish uchun sifatliroq yorug‘lik bilan olingan yangi tasvirlar kerak bo‘ladi. Namunaning yangi suratlari Yerga 4-sentabr kuni uzatilishi kutilmoqda.

Perseverance tuproq namunalarini yig‘ish va saqlash tizimi bilan jihozlangan bo‘lib, zarbali-aylanma burg‘ulash texnologiyasidan foydalanadi. Perseverance 2 metr uzunlikdagi robotlashtirilgan “qo‘li”ga mahkamlangan parma yordamida Perseverance tanlangan namunani parmalab teshadi va undan materialni chiqarib oladi, u esa so‘ng rezervuarga tushadi va roverning ichida saqlanadi.

5-avgust kuni marsoxod sayyoradan tuproq namunasini olishga urinib ko‘rdi, ammo bu muvaffaqiyatsiz kechdi — NASA mutaxassislari fikricha, parmalash uchun tanlangan tosh drel ta’siri ostida maydalanib ketib, changga aylangan.

Kelajakda roverning Marsdagi missiyasi chog‘ida to‘plangan namunalar NASA va Yevropa kosmik agentligining qo‘shma missiyasi doirasida Yerga yetkazilishi kutilmoqda.

Avvalroq Perseverance marsoxodi Mars atmosferasidan kislorod ajratib olishga muvaffaq bo‘lgan edi. Ushbu sinovni marsoxod 20-aprel — sayyorada o‘tkazayotgan 60-kunida amalga oshirdi. Amerika koinot agentligi aniqlik kiritishicha, bu kashfiyot kelajakda kosmonavtlarni nafas olish uchun yaroqli bo‘lgan havo bilan ta’minlashda yordam beradi. Ta’kidlanishicha, qizil sayyora atmosferasining 96 foizini karbonat angidrid tashkil etadi.

Perseverance marsoxodi ortilgan raketa 2020-yil iyulida Florida shtatida joylashgan Kanaveral burnidagi kosmodromdan uchirilgan edi. Fevralda Amerika roveri Yezero krateriga borib qo‘ndi. Bungacha sun’iy yo‘ldoshdan olingan ma’lumotlar yordamida u yerda katta ko‘lga borib quyilgan daryo o‘zani izlari aniqlangan edi. Olimlar fikricha, kraterda hayot izlari saqlanib qolgan bo‘lishi mumkin.