Дзюдо бўйича Ўзбекистон терма жамоаси аъзоси, Рио-2016 Олимпия ўйинлари совриндори, Осиё ўйинлари ғолиби, Осиё чемпионати кумуш медали соҳиби Диёрбек Ўрозбоевдан олинган допинг-синамада тақиқланган модда аниқланган. Бу ҳақида Миллий антидопинг агентлиги матбуот хизмати хабар қилади.
Шу сабабли спортчи 3 йилга барча мусобақалардан четлатилди.
Диёрбек Ўрозбоев Ўзбекистон Миллий антидопинг агентлигининг «Миллий тест рўйхати»га киритилган бўлиб, режали тарзда допинг-назоратидан ўтиши белгиланган. 2021 йилнинг 6 май куни спортчидан допинг-синама олинган. Текширув натижасида спортчи томонидан Бутунжаҳон антидопинг кодекси ва Ўзбекистон Миллий антидопинг қоидаларининг 2.1-моддасида кўрсатилган антидопинг қоидабузарлиги содир этилган, яъни у мелдониум тақиқланган моддаси истеъмол қилгани аниқланган.
Натижада Ўрозбоев 3 йил муддатга дисквалификация қилинди. Дисквалификация 2021 йил 16 августдан 2024 йил 15 августга қадар этиб белгиланди.
Дзюдочи дисквалификация муддати тугагунига қадар Бутунжаҳон антидопинг кодекси ва Ўзбекистон Миллий антидопинг қоидаларининг 2.1-моддасида белгилаб қўйилганидек, халқаро ва миллий тоифадаги мусобақаларда иштирок этиши тақиқланади.
Аввалроқ белбоғли кураш устаси Мардондек Кимсанов ва каратэ бўйича Осиё чемпиони Нодира Жуманиёзова, самбочи Дилшод Чориев ва ўзбекистонлик 7 нафар оғир атлетикачи допинг сабабли 4 йилга, UFC жангчиси Лилия Шокирова эса 2 йил муддатга дисквалификация қилингани маълум бўлганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)