ОФК Кубоги финалига йўл олган «Насаф», Роналдуга етиб олган Месси ва апрелдан бери ютқазмаётган «Ливерпуль». Энг сўнгги спорт янгиликлари

Дунё ва ўзбек спортига оид 20 октябрь кунининг энг муҳим хабарлари дайжести билан танишинг.

Ўзбекистон

Футбол бўйича Ўзбекистон Кубогининг 1/4 финалидан ўрин олган дастлабки ўйинда «Пахтакор» «Олимпик» билан баҳс олиб бориб, кичик ҳисобда ғалаба қозонди.

Шу тариқа «шерлар» мамлакат Кубоги ярим финалига йўл олган илк жамоага айланди. Мазкур босқичнинг қолган ўйинлари 28—29 октябрь кунлари бўлиб ўтади.

«Насаф» ОФК Кубоги финалига йўл олди

Қаршининг «Насаф» клуби ОФК Кубогининг ярим финалида Гонконгнинг «Ли Ман» жамоасини 3:2 ҳисобида мағлуб этиб, мусобақа финалига йўл олди.

Ҳал қилувчи ўйинда «Насаф» «Ал-Муҳаррақ» (Баҳрайн) ва «Ал-Кувайт» (Кувайт) жуфтлиги ғолиби билан тўқнаш келади. Мазкур баҳс ҳам 20 октябрь куни бўлиб ўтади. Финал учрашуви эса 5 ноябрь куни бўлиб ўтади.

Алишер Усмонов номзоди FIE раҳбарлигига тавсия этилди

2021 йилда Халқаро қиличбозлик федерациясининг (FIE) ҳисобот-сайлов Конгресси ташкил этилади. Унда ташкилот раҳбариятига сайлов ўтказилади.

МОҚ матбуот хизматининг ёзишича, Россия қиличбозлик федерацияси мазкур сайловга мамлакат номидан FIE’нинг амалдаги раҳбари Алишер Усмоновнинг номзодини илгари сурган. Шу тариқа 27 ноябрь куни Швейцарияда ўтказиладиган FIE Конгрессида Усмонов номзоди кўриб чиқилади.

Маълумот учун, асли келиб чиқиши ўзбекистонлик бўлган Алишер Усмонов 2008 йилдан бери ушбу халқаро ташкилотни бошқариб келмоқда. У FIE’га 2012 ва 2016 йилларда қайта сайланган.

Жаҳон

«Реал» собиқ бош мураббийи Зинедин Зидан «Манчестер Юнайтед»ни бошқариши мумкин, деб ёзмоқда El Chiringuito TV.

Манбага кўра, Манчестер клуби Криштиану Роналдунинг тавсиясига бўйича франциялик мутахассис билан алоқага чиққан.

Аввалроқ жамоанинг айни пайтдаги бош мураббийи Оле-Гуннар Сульшер сўнгги вақтлардаги қониқарсиз натижалар туфайли истеъфога чиқарилиши мумкинлиги ҳақида хабарлар тарқалганди.

Саудияликлар қўлига ўтган «Ньюкасл» Стив Брюсни истеъфога чиқарди

«Ньюкасл» бош мураббийи Стив Брюс ўз лавозимини тарк этди. Клуб ўз баёнотида томонлар ўзаро келишувга биноан шартномани бекор қилганини эълон қилди.

Шунингдек, «қарғалар» яқин вақт ичида янги мураббий номини эълон қилишини ҳам маълум қилди.

60 ёшли Брюс «Ньюкасл»да 2019 йилдан буён ишлаб келаётганди. У клуб Саудия Арабистони фонди томонидан сотиб олингач, жамоа бошқарувида атиги битта ўйин ўтказди.

Месси Чемпионлар Лигасида Роналдуга етиб олди

«ПСЖ» ҳужумчиси Лионель Месси Чемпионлар Лигаси 3-тури доирасидаги «Лейпциг»га қарши ўйинда (3:2) дубль қайд этди.

Немис клуби («Лейпциг») аргентиналик ҳужумчининг Чемпионлар Лигасида гол урган 37-жамоаси бўлди.

Шу тариқа Месси ушбу кўрсаткич бўйича «Манчестер Юнайтед» ҳужумчиси Криштиану Роналдуга етиб олди. Роналду ҳам ЕЧЛ доирасида 37 та жамоа дарвозасини ишғол қилган.

Шунингдек, ушбу дубль туфайли 34 ёшли Мессининг 2021 йилдаги голлари сони 40 тага етди. Месси фаолиятида 12 марта бир календарь йилида 40 тадан кўпроқ гол уришни уддалади.

Салоҳ «Ливерпуль» рекордини ўрнатди

«Ливерпуль» ҳужумчиси Муҳаммад Салоҳ Чемпионлар Лигаси 3-туридан ўрин олган ўйинда «Атлетико» дарвозасига иккита гол урди.

Шу тариқа мисрлик футболчи мусобақадаги голлар сони бўйича клуб рекордини ўрнатди — 31.

Бунгача энг яхши натижа мусобақада 30 та гол урган Стивен Жеррардга тегишли эди.

«Ливерпуль» 21 та ўйиндан бери ютқазмаяпти

«Ливерпуль» Чемпионлар Лигаси гуруҳ босқичи 3-тур учрашувида «Атлетико»ни мағлуб этди (3:2).

Юрген Клопп шогирдлари шу тариқа барча мусобақалардаги мағлубиятсиз сериясини 21 учрашувга етказиб олди — 15 ғалаба, 6 дуранг.

«Қизиллар» охирги марта 2021 йилнинг апрель ойида ЕЧЛ 1/4 финалида «Реал»га мағлуб бўлганди (1:3).

«Ювентус» ва Дибала янги шартнома борасида келишиб олди

«Ювентус» ҳужумчи Пауло Дибала билан янги шартнома имзолашга яқин.

Tuttosport’нинг хабар қилишича, аргентиналик футболчи «кекса синьора»  билан 2026 йилнинг ёзига қадар мўлжалланган битим борасида келишувга эришган. Дибаланинг агенти музокараларнинг сўнгги деталларини ҳал қилиш учун Туринга етиб борган.

Янги битимга кўра, Дибала йилига 8,5 миллион евро маош олади. Бундан ташқари, 1,5 миллион евро миқдорида бонуслар ҳам кўзда тутилган.

«ПСЖ» Мбаппени текинга қўйиб юбормоқчи эмас

«ПСЖ» 2022 йилнинг ёзида эркин агентга айланадиган ҳужумчи Килиан Мбаппе билан янги шартнома имзоламоқчи.

Парижликлар 22 ёшли футболчини клубда қолишга кўндирмоқчи ва унга клуб лойиҳасида асосий ролни кафолатламоқчи.

Қайд этилишича, «ПСЖ» Мбаппега қисқа муддатли шартнома таклиф қилади ва бир йилдан сўнг унга бошқа клубга ўтишига қаршилик кўрсатмасликни ваъда беради. Парижликлар шу йўл билан Килианни жамоада олиб қолмоқчи. Боиси улар уни текинга қўйиб юборишни истамайди.

Эслатиб ўтамиз, аввалроқ Мбаппе қанча пул таклиф қилинишидан қатъи назар, 2022 йилнинг ёзида «ПСЖ»ни тарк этишга аҳд қилгани ва «Реал»га ўтиши ҳақида хабар берилганди.