Ўзбекистонда ўртача пенсия миқдори қанча?

Ўзбекистонда 1991—2021 йиллар давомида Президент фармонларига асосан пенсиялар миқдори 67 маротаба оширилган. Бу ҳақда Молия вазирлиги ҳузуридаги Бюджетдан ташқари пенсия жамғармаси матбуот хизмати хабар берди.

Пенсия жамғармаси тизимида ҳисобга олинган пенсия олувчиларнинг 2016 йил 1 январь ҳолатига республика бўйича бир ойлик ўртача пенсия миқдори 421 629 сўм бўлган бўлса, 2021 йил сентябрь ойида 924 780 сўмга етган. Яъни ўтган даврда Ўзбекистон Президентининг фармонларига асосан пенсиялар миқдори 2,2 бараварга оширилган.

Шундан, 2021 йил сентябрь ҳолатига кўра бир ойлик ўртача пенсия миқдори:

• Тошкент шаҳрида — 1 250 992 сўм;
• Навоий вилоятида — 1 176 323 сўм;
• Тошкент вилоятда — 1 012 617 сўм;
• Бухоро вилоятида — 941 411 сўм;
• Сирдарё вилоятида — 936 392 сўм;
• Қорақалпоғистон Республикасида — 918 930 сўм;
• Самарқанд вилоятида — 902 172 сўм;
• Қашқадарё вилоятида — 876 728 сўм;
• Хоразм вилоятида — 870 800 сўм;
• Сурхондарё вилоятида — 850 685 сўм;
• Жиззах вилоятида — 848 930 сўм;
• Фарғона вилоятида — 836 856 сўм;
• Наманган вилоятида — 802 125 сўм;
• Андижон вилоятида — 801 640 сўм.

Шунингдек, 2021 йил 1 октябрь ҳолатига кўра, республика бўйича пенсия олувчиларнинг умумий сони 3 548 093 нафарни ташкил этмоқда (умумий аҳоли сонидаги улуши 10,2 фоиз). Бу 1991 йил 1 январь ҳолатига нисбатан 1 389 098 нафарга ёки 64,3 фоизга кўп демак.

Мамлакатда пенсия олувчиларнинг умумий сони бўйича энг юқори кўрсаткич Фарғона вилоятига тегишли бўлса (462 204 нафар), Сирдарё вилоятида энг кам — 103 140 нафар.

Эслатиб ўтамиз, Президент фармони билан 1 сентябрдан бошлаб бюджет ташкилотлари ходимларининг иш ҳақи, пенсия, стипендия ва нафақалар миқдори 1,1 баробарга оширилди. Фармонга кўра, пенсияни ҳисоблашнинг базавий миқдори — ойига 289 000 сўм, ёшга доир энг кам пенсиялар — ойига 565 000 сўм, болаликдан ногиронлиги бўлган шахсларга бериладиган нафақа — ойига 622 000 сўм этиб белгиланган.