Сенатнинг Хотин-қизлар ва гендер тенглик масалалари қўмитаси ижтимоий тармоқларда тарқалган Фарғона вилоятида 4 нафар фарзанди билан кўчада қолгани айтилаётган аёл видеосига боғлиқ ҳолатни ўрганди. Бу ҳақда парламент юқори палатаси матбуот хизмати хабар берди.
«Озодлик радиоси»нинг Facebook’даги саҳифасида 27 сентябрь куни ҳокимлик вакиллари томонидан тўрт нафар фарзанди билан уйидан чиқариб юборилгани айтилаётган аёлнинг видеоси эълон қилинганди. Кадрдаги аёлнинг сўзларига кўра, у бир неча кун давомида турли идораларга учраган бўлса ҳам, муаммоси ҳал бўлмаган.
«Ноқонуний яшаяпсизлар деб, тайёр яшаётган уйимни муҳрлаб, фарзандларим билан кўчага чиқариб қўйишди. Бир оғиз огоҳлантиришмади ҳам. Тўрт болам билан кўчада қолдим. Бир неча кундан бери турли идораларга учраяпман. Фарғона вилояти ҳокими Хайрулла Бозоров қўл остидагиларга топширяпти, аммо натижа йўқ...», — дейди аёл.
Видеолавҳа ижтимоий тармоқларда тарқалгач, Сенат қўмитаси ҳолат юзасидан ўрганиш ишларини олиб бориб, 19 октябрь куни унинг натижаларини маълум қилди. Аниқланишича, видеолавҳа дастлаб 2 ой аввал эълон қилинган, унда акс этган фуқаро М.Саидова 1978 йилда Фарғона вилояти Қўштепа туманида туғилган ва доимий рўйхатдан туради.
М.Саидова Андижон вилоятига турмушга чиққан бўлиб, ҳозирда ўз оиласи билан бирга яшамайди. Андижон вилоятида ушбу оиланинг барча шароитларга эга 20 сотихдан иборат ҳовли жойи мавжуд. М.Саидованинг турмуш ўртоғи у ва фарзандлари билан бирга яшаш нияти борлигини, улар қайтиб Андижондаги ҳовлида бирга яшашлари мумкинлигини билдирган.
Бундан ташқари, М.Саидова Фарғона вилоятига қайтгач, унга Қўштепа туманидан вақтинча яшаш учун турар жой таклиф қилинган, бироқ аёл буни рад этган. Лекин М.Саидова Фарғона шаҳар Янги аср кўчаси 190-уй 42-хонадонга ноқонуний тарзда кириб ўрнашиб олган. Ушбу хонадон шаҳар ҳокимлигининг 2018 йил 11 июлда ордер асосида Меҳрибонлик уйида тарбияланиб чиққан, ота-она қарамоғидан маҳрум бўлган фуқаро Тимур Будескога Етим болалар ва ота-она қарамоғидан маҳрум бўлган болаларни турар жойлар билан таъминлаш бўйича белгиланган тартибда хусусийлаштириш ҳуқуқисиз, ижара асосида бириктириб берилган.
Фуқаро Будеско 2019 йилга қадар ушбу хонадонда яшаб, Россияга ишлаш учун чиқиб кетишидан олдин Уй-жой кодексида белгиланган тартибда чет элга ишга кетган даврида турар жойга бўлган ҳуқуқини сақлаб қолишга гувоҳнома (брон) олиш учун шаҳар ҳокимлигига мурожаат қилмаган, ҳеч қандай асоссиз бу хонадонни фуқаро Ў.Бахтахуновага топшириб кетган.
Шаҳар ҳокимлигининг хўжалик ҳисобидаги уй-жой бўлими мутахассислари томонидан олиб борилган хатловлар натижасида, фуқаро Ў.Бахтахунова таниши М.Сайидовани ўзаро келишув асосида мазкур хонадонга ўзбошимчалик билан ноқонуний тарзда жойлаштиргани маълум бўлган.
Юқоридаги ҳолат юзасидан фуқаролар Ў.Бахтахунова ва М.Саидовага давлат уй-жой фондидан фойдаланиш тартиби қўпол равишда бузилгани, ота-она қарамоғидан маҳрум бўлган фуқарога ижара асосида берилган ушбу хонадондан бегона шахслар фойдаланиши қонунга зид эканлиги бўйича ҳуқуқий тушунтиришлар берилган.
М.Сайидованинг уй-жой шароити ўрганилган, у уй-жойга муҳтожлиги юзасидан шаҳар ҳокимлигига шу кунга қадар ариза билан мурожаат этмаган ва уй-жойга муҳтож бўлган оилалар сифатида шаҳар ҳокимлигида ҳисобда турмаслиги аниқланган. Унга давлат уй-жой фондидан турар жой олиш учун белгиланган тартибда яшаш жойидаги маҳаллий давлат ҳокимияти органларига ариза бериш йўли билан навбат тартибида олиши мумкинлиги тушунтирилган.
Ушбу хонадон бўйича келиб чиққан низоларни қонуний ҳал этиш учун Фарғона шаҳар ҳокимлиги томонидан Фуқаролик ишлари бўйича Фарғона туманлараро судига даъво аризаси киритилган ва суд томонидан қарор қабул қилингунга қадар фуқаро М.Сайидованинг манфаатини кўзлаган ҳолда ҳокимлик томонидан Янги аср кўчаси, 190-уйнинг 42-хонадонига жойлаштирилган ва ҳозирги кунга қадар яшаб келмоқда.
Аввалроқ Тошкентда 7 ёшли боласи билан кўчада қолгани айтилган аёлнинг ҳолати Сенат томонидан назоратга олингани тўғрисида хабар берилганди.
Изоҳ (0)