Интерполнинг Ўзбекистондаги Миллий марказий бюроси катта миқдордаги фирибгарликда айбланган икки шахс Жанубий Кореядан Ўзбекистонга экстрадиция қилинганини маълум қилди.
Қайд этилишича, 2021 йилнинг октябрь ойида Жанубий Кореянинг Сеул шаҳрида Ўзбекистондаги Интерпол Миллий марказий бюроси, Тошкент вилояти Ички ишлар бош бошқармаси ва Жанубий Кореянинг Интерпол ММБ ходимларининг ҳамкорликдаги тезкор қидирув тадбирлари ўтказилган.
Ушбу тадбирлар натижасида республика ҳуқуқ-тартибот идоралари томонидан Ўзбекистон Жиноят кодексининг 169-моддаси (ўғрилик) 2-қисми, 168-моддаси (фирибгарлик) 2-қисми билан белгиланган оғир жиноятларни содир этгани учун республика ҳуқуқни муҳофаза қилиш органлари томонидан халқаро миқёсда қидирувда бўлган 30 ёшли шахс қўлга олинган.
Олинган маълумотларга асосан, Сеулда хизмат сафарида бўлган, катта миқдордаги фирибгарлик жиноятини содир этгани учун қидирувда бўлган яна бир Ўзбекистон фуқароси — 64 ёшли Ж.Н. қўлга олинган. У 2016 йилда фуқаролар ишончига кириб, алдов йўли билан Тошкент шаҳридан кўчмас мулк харидида ёрдам беришини ваъда қилиб, улардан олган пулларни ўз эҳтиёжлари учун сарфлаб юборган.
«Бугунги кунда музокаралар ва Ўзбекистондаги Интерполнинг ММБ ҳамда Тошкент вилояти ИИББ ЖҚБ ходимларининг ҳамкорликдаги тезкор ҳаракатлари туфайли қидирувдаги иккала шахс ҳам қўлга олиниб, Ўзбекистон Республикасига топширилди ва энди улар қилмишлари учун судда жавоб беради», — дейилади хабарда.
Эслатиб ўтамиз, 2021 йилнинг февралида Россия Бош прокуратураси мулкка қарши жиноятлар ва гиёҳванд моддалар савдосида айбланаётган 10 нафар Ўзбекистон фуқаросини жиноий жавобгарликка тортиш учун Ўзбекистоннинг ваколатли органларига топширганди. Сентябрь ойида Ўзбекистон ҳудудида жиноят содир этган яна 4 нафар фуқаро Россиядан экстрадиция қилинди.
Изоҳ (0)