Andijon viloyatida besh nafar erkak dala shiyponida 18 yoshli kelinni zo‘rlagani, kelinning yaqinlari qonunbuzarlarga chora ko‘rishni so‘rayotgani haqida xabarlar tarqalgan, holat yuzasidan jinoyat ishi qo‘zg‘atilgandi. Mazkur holat Senatning Xotin-qizlar va gender tenglik masalalari qo‘mitasi tomonidan nazoratga olindi.

Foto: Videodan kadr

Senat matbuot xizmatining qayd etishicha, 17-may kuni Andijon viloyati Ichki ishlar boshqarmasi tomonidan o‘rnatilgan tartibda qo‘mitaga dastlabki ma’lumotlar taqdim etildi. Hozirda mazkur holat yuzasidan jinoyat ishi qo‘zg‘atilib, Andijon viloyati IIB tomonidan dastlabki tergov harakatlari olib borilmoqda.

Eslatib o‘tamiz, ijtimoiy tarmoqlarda tarqalgan xabarda Andijon viloyatida 5 oylik kelinchak dala shiyponida idishlarni yuvish uchun chiqqanida spirtli ichimlik ta’sirida bo‘lgan besh kishi tomonidan qo‘l-oyog‘ini bog‘lab, zo‘rlangani aytilgan. Holat yuzasidan viloyat prokuraturasi bayonot berib, tegishli ekspertizalar tayinlangani, tergovga qadar tekshiruv harakatlari davom etayotganini bildirgan. Bosh prokuratura matbuot xizmati holat bo‘yicha qo‘shimcha ma’lumotlarni taqdim etib, ayolni zo‘rlaganlikda besh emas, balki olti kishi gumon qilinayotgani, ularning barchasi Andijon tumanida yashashini ma’lum qilgandi.