Senatning Xotin-qizlar va gender tenglik masalalari qo‘mitasi ijtimoiy tarmoqlarda tarqalgan Farg‘ona viloyatida 4 nafar farzandi bilan ko‘chada qolgani aytilayotgan ayol videosiga bog‘liq holatni o‘rgandi. Bu haqda parlament yuqori palatasi matbuot xizmati xabar berdi.
“Ozodlik radiosi”ning Facebook’dagi sahifasida 27-sentabr kuni hokimlik vakillari tomonidan to‘rt nafar farzandi bilan uyidan chiqarib yuborilgani aytilayotgan ayolning videosi e’lon qilingandi. Kadrdagi ayolning so‘zlariga ko‘ra, u bir necha kun davomida turli idoralarga uchragan bo‘lsa ham, muammosi hal bo‘lmagan.
“Noqonuniy yashayapsizlar deb, tayyor yashayotgan uyimni muhrlab, farzandlarim bilan ko‘chaga chiqarib qo‘yishdi. Bir og‘iz ogohlantirishmadi ham. To‘rt bolam bilan ko‘chada qoldim. Bir necha kundan beri turli idoralarga uchrayapman. Farg‘ona viloyati hokimi Xayrulla Bozorov qo‘l ostidagilarga topshiryapti, ammo natija yo‘q...”, — deydi ayol.
Videolavha ijtimoiy tarmoqlarda tarqalgach, Senat qo‘mitasi holat yuzasidan o‘rganish ishlarini olib borib, 19-oktabr kuni uning natijalarini ma’lum qildi. Aniqlanishicha, videolavha dastlab 2 oy avval e’lon qilingan, unda aks etgan fuqaro M.Saidova 1978-yilda Farg‘ona viloyati Qo‘shtepa tumanida tug‘ilgan va doimiy ro‘yxatdan turadi.
M.Saidova Andijon viloyatiga turmushga chiqqan bo‘lib, hozirda o‘z oilasi bilan birga yashamaydi. Andijon viloyatida ushbu oilaning barcha sharoitlarga ega 20 sotixdan iborat hovli joyi mavjud. M.Saidovaning turmush o‘rtog‘i u va farzandlari bilan birga yashash niyati borligini, ular qaytib Andijondagi hovlida birga yashashlari mumkinligini bildirgan.
Bundan tashqari, M.Saidova Farg‘ona viloyatiga qaytgach, unga Qo‘shtepa tumanidan vaqtincha yashash uchun turar joy taklif qilingan, biroq ayol buni rad etgan. Lekin M.Saidova Farg‘ona shahar Yangi asr ko‘chasi 190-uy 42-xonadonga noqonuniy tarzda kirib o‘rnashib olgan. Ushbu xonadon shahar hokimligining 2018-yil 11-iyulda order asosida Mehribonlik uyida tarbiyalanib chiqqan, ota-ona qaramog‘idan mahrum bo‘lgan fuqaro Timur Budeskoga Yetim bolalar va ota-ona qaramog‘idan mahrum bo‘lgan bolalarni turar joylar bilan ta’minlash bo‘yicha belgilangan tartibda xususiylashtirish huquqisiz, ijara asosida biriktirib berilgan.
Fuqaro Budesko 2019-yilga qadar ushbu xonadonda yashab, Rossiyaga ishlash uchun chiqib ketishidan oldin Uy-joy kodeksida belgilangan tartibda chet elga ishga ketgan davrida turar joyga bo‘lgan huquqini saqlab qolishga guvohnoma (bron) olish uchun shahar hokimligiga murojaat qilmagan, hech qanday asossiz bu xonadonni fuqaro O‘.Baxtaxunovaga topshirib ketgan.
Shahar hokimligining xo‘jalik hisobidagi uy-joy bo‘limi mutaxassislari tomonidan olib borilgan xatlovlar natijasida, fuqaro O‘.Baxtaxunova tanishi M.Sayidovani o‘zaro kelishuv asosida mazkur xonadonga o‘zboshimchalik bilan noqonuniy tarzda joylashtirgani ma’lum bo‘lgan.
Yuqoridagi holat yuzasidan fuqarolar O‘.Baxtaxunova va M.Saidovaga davlat uy-joy fondidan foydalanish tartibi qo‘pol ravishda buzilgani, ota-ona qaramog‘idan mahrum bo‘lgan fuqaroga ijara asosida berilgan ushbu xonadondan begona shaxslar foydalanishi qonunga zid ekanligi bo‘yicha huquqiy tushuntirishlar berilgan.
M.Sayidovaning uy-joy sharoiti o‘rganilgan, u uy-joyga muhtojligi yuzasidan shahar hokimligiga shu kunga qadar ariza bilan murojaat etmagan va uy-joyga muhtoj bo‘lgan oilalar sifatida shahar hokimligida hisobda turmasligi aniqlangan. Unga davlat uy-joy fondidan turar joy olish uchun belgilangan tartibda yashash joyidagi mahalliy davlat hokimiyati organlariga ariza berish yo‘li bilan navbat tartibida olishi mumkinligi tushuntirilgan.
Ushbu xonadon bo‘yicha kelib chiqqan nizolarni qonuniy hal etish uchun Farg‘ona shahar hokimligi tomonidan Fuqarolik ishlari bo‘yicha Farg‘ona tumanlararo sudiga da’vo arizasi kiritilgan va sud tomonidan qaror qabul qilingunga qadar fuqaro M.Sayidovaning manfaatini ko‘zlagan holda hokimlik tomonidan Yangi asr ko‘chasi, 190-uyning 42-xonadoniga joylashtirilgan va hozirgi kunga qadar yashab kelmoqda.
Avvalroq Toshkentda 7 yoshli bolasi bilan ko‘chada qolgani aytilgan ayolning holati Senat tomonidan nazoratga olingani to‘g‘risida xabar berilgandi.
Izoh (0)