YouTube’da 700 mingdan ortiq obunachisi bo‘lgan Max Tech kanalida iPhone 13 Pro Max, iPhone 12 Pro Max hamda iPhone 11 Pro Max kameralarining o‘zaro taqqoslangani namoyish etilgan rolik e’lon qilindi, deb xabar beradi IXBT.

Kadr: YouTube

Ushbu rolik iPhone 11 Pro Max yoki 12 Pro Max’i bor foydalanuvchilarga yangi smartfon olish kerak yoki kerakmasligi borasida tug‘ilgan savollariga javob bo‘la oladi. Video muallifi yangi standart keng burchakli kamera, o‘ta keng burchakli kamera va 3 karra yaqinlashiruvchi yangi teleobyektivni 12 Pro Max hamda 11 Pro Max’ning kameralari bilan turli testlar (kunduzgi va tungi suratga olish, portret, makro va hokazo) jarayonida solishtirgan. Shuningdek, yangi rejimlarga izoh berilgan, jumladan, Cinematic Mode’ga ham.

Bundan tashqari, Max Tech iPhone 13 Pro va 13 Pro Max’ning o‘ta keng burchakli kamerasida makro suratga olishni avtomatik yoqish rejimini o‘chirib qo‘yishning oddiy usulini ham topgan. iPhone 13 Pro’ning asosiy kamerasi yoki teleobyektividan foydalanishning eng oddiy yo‘li — barmoq bilan o‘ta keng burchakli kamerani yopib turish.

Apple iPhone 13 Pro va iPhone 13 Pro Max avtomatik ravishda o‘ta keng burchakli kamerani yoqish yoki o‘chirishni avtomatik boshqaradigan yangilangan dasturiy ta’minotni taqdim etishga va’da bergan. Ammo iOS 15.0.1 da bu kabi tuzatish mavjud emas.

Avvalroq amerikalik shifokor iPhone 13 Pro Max’ning kamerasidan ko‘z kasalliklariga tashxis qo‘yishda foydalanib ko‘rgani to‘g‘risida xabar berilgandi.