Topqir oftalmolog yangi iPhone 13 Pro Max’ning makro suratga olish rejimidan ko‘z kasalliklariga tashxis qo‘yishda foydalanib ko‘rdi, deb xabar beradi Hi-Tech.Mail.ru.

Foto: 9to5mac

Linkedln ijtimoiy tarmog‘ida Tommi Korn ismli amerikalik shifokor yangi iPhone 13 Pro Max’dan qanday qilib bemorning ko‘rish qobiliyatini tekshirganini so‘zlab berdi. U muvaffaqiyatli natijadan hayratga tushganini aytib, endilikda “innovatsiyani ko‘zlarni parvarishlash sohasiga joriy etish” niyatida ekanini ta’kidlagan.

Shifokor makrosuratga olish rejimi yordamida har bir qabul davomida bemor ko‘zining mayda detallariga qadar tasvirga olgan va u orqali davolanish jarayonini kuzatgan — bemorga avvalroq muguz parda ko‘chirib o‘tkazilgan bo‘lgan.

Foto: 9to5mac

iPhone’dagi makrosuratga olish rejimi qanday ishlaydi?

Apple’ning yangi smartfonlar seriyasidagi Pro-modellarga kattalashtirilgan diafragmali, (ƒ/1.8) o‘ta keng burchakli kamera o‘rnatilgan. Obyektivning yangi konstruksiyasi, avtofokus funksiyasi (iPhone’ning o‘ta keng burchakli kameralarida birinchi bor) va ilg‘or dasturiy ta’minot buyumlarning yirik plandagi tiniq suratlarini olish imkonini beradi. Minimal masofa — 2 santimetr.

Avvalroq “Smartfonlar orasidagi eng yaxshi displey” nomiga iPhone 13 Pro Max sazovor bo‘lgani to‘g‘risida xabar berilgandi.