Афғонистонни тарк этган АҚШ ҳозирча Сурия ва Ироқдан ўз армиясини олиб чиқмоқчи эмас. Бу ҳақда АҚШнинг исми сир қолишини истаган амалдори Al-Arabiya телеканалига маълум қилди.
«Ҳозирча биз ҳеч қаерга кетмоқчи эмасмиз. Афғонистон — бу алоҳида масала, унинг Сурия ва Ироқдаги қўшинларимизга дахли йўқ», — деди дипломатик манба телеканалга.
Унинг таъкидлашича, Америка маъмурияти Яқин Шарқнинг бирорта нуқтасида ўз ҳарбий иштирокини камайтирмоқчи эмас.
Манбадан Суриядаги вазият ҳақида сўралганда, у Вашингтон ўз эътиборини АҚШ ва унинг иттифоқчиларига ҳужум қилиш имконияти ва истаги бор террорчи гуруҳларга, яъни ИШИД ва «Ал-Қоида»га қарши курашга қаратмоқда, деб жавоб берди. Унинг қўшимча қилишича, террорчилар ўз ниятларини ҳозирда Сурия шимоли-шарқидаги турли муваққат қамоқхоналарда сақланаётган 10 минг ИШИД жангарилари ҳисобидан, шунингдек, ҳаддан зиёд гавжум қочқинлар лагерларидаги ўн минглаб ички кўчирилганлар ҳисобидан амалга ошириши мумкин.
Бу орада Пентагон матбуот котиби Жессика Макналтининг маълум қилишича, Вашингтон «Ироқ ҳукуматининг таклифига биноан мамлакатдаги АҚШ ҳарбий кучларининг Ироқ хавфсизлик кучларини ҳамда ИШИДга қарши курашда етакчилик қилаётган курд посбонларини қўллаб-қувватлашига содиқ қолади».
Июль ойида АҚШ президенти Жо Байден Ироқ бош вазири Мустафо ал-Козимий билан учрашувда Ироқ ҳудудидаги Америка ҳарбий миссияси 2021 йилнинг охиригача тугашини эълон қилганди; шу билан бирга, АҚШ ҳарбийлари Ироқ хавфсизлик кучларини ўқитиш, маслаҳат бериш ва разведка орқали қўллаб-қувватлашда давом этади.
Ўз навбатида, АҚШнинг Сурия бўйича махсус вакили Жоэл Рейберннинг айтишича, «Сурия ва Ироқдан унча кўп бўлмаган АҚШ қўшинларини олиб чиқиш» ҳақидаги ҳар қандай мунозара жиддий хато ва масъулиятсизлик бўлади.
«Агар Қўшма Штатлар кетиши керак бўлса, уларнинг ўрнини террорчилар, Эрон, Асад (Сурия президенти Асад Башар кучлари) ва Россия тўлдиради — бу бизнинг минтақадаги энг муҳим манфаатларимиз учун жиддий оқибатлар келтириб чиқаради», — дея Al-Arabiya Рейберннинг сўзларидан иқтибос келтирди.
Ҳозирги кунда Ироқ ҳудудида 3,5 мингга яқин хорижий ҳарбий хизматчи бор, улардан 2,5 мингтаси АҚШ ҳарбийлари. Улар Ироқда 2014 йилдан бери бўлиб турибди. Ҳарбийлар Ироққа жангариларга қарши курашда ёрдам бермоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)