Johns Hopkins университети маълумотларига кўра, дунёда коронавирусга чалинганлар сони 239 610 747 кишига етди, шуларнинг 4 882 095 нафари вафот этган. Жаҳон бўйича қўлланилган вакциналар эса 6,576 миллиард дозани ташкил қилмоқда.
Касалланганлар сони бўйича АҚШ (44,7 миллион), Ҳиндистон (34 миллион), Бразилия (21,6 миллион), Буюк Британия (8,3 миллион) ва Россия (7,7 миллион) энг олдинда бормоқда.
Латвия президенти коронавирусга чалинди
Латвия президенти Эгил Левиц коронавирусга топширган экспресс-тест мусбат натижа берди, шу сабабли у Эстония президенти Алар Карис билан учрашувни кейинга қолдирди.13 октябрь куни Латвия етакчиси Швецияга хизмат ташрифидан қайтиб келиб, COVID-19 га экспресс-тест топширган эди. 14 октябрь куни эса у ПЗР-тестдан ҳам ўтди. Левиц Карис билан шахсан боғланиб, саммитни кечиктиришни сўраган.
Шунга қарамай, Эстония президенти 14 октябрь куни ишчи ташриф билан Ригага келди. Шу куни у Сейм раиси Инара Мурниеце билан учрашди.
Левиц 2021 йил февралида COVID-19 га қарши эмланган эди.
Мавзуга доир: Латвия президенти ЙТҲга учради
Жанубий Корея президенти COVID-19 га қарши қайта эмланди
Корея Республикаси президенти Мун Чже Ин ва унинг рафиқаси Ким Чжон Сук 15 октябрь куни коронавирусга қарши вакцинанинг бустер (кучайтирувчи, қўшимча) дозасини олди.«Соғлиқни сақлаш вазирлиги томонидан қабул қилинган ревакцинация тўғрисидаги қоидаларга мувофиқ, Мун Чже Ин ва Ким Чжон Сук Pfizer компанияси томонидан ишлаб чиқарилган вакцина дозаси билан эмланди», — дейилади президент матбуот хизмати хабарида.
Айни пайтга қадар мамлакатда 31,6 миллион киши ёки аҳолининг 61,6 фоизи тўлиқ эмланган. Ҳукумат ушбу кўрсаткични шу ой охиридаёқ 70 фоизгача кўтариш учун вакцинация суръатларини оширишга уринмоқда.
Бразилия президенти коронавирусга қарши эмланишдан бош тортди
Бразилия президенти Жаир Болсонару COVID-19 га қарши вакцина билан эмланмаслигини маълум қилди. Бунгача эса у эмланадиган «сўнгги бразилиялик» бўлишини айтган эди.
«Мен вакцина олмасликка қарор қилди. Янги тадқиқотларга қараяпман, менда иммунизация даражаси шундоқ ҳам жуда юқори бўлса, эмланиб нима қиламан? Бу худди 2 реал пул ютиб олиш учун 10 реалга лотерея сотиб олишдек гап. Бу беҳуда», — деди Болсонару.
У, шунингдек, тўлиқ эмланганларга бериладиган ва маълум бир жамоат жойларига кириш учун талаб қилинадиган санитар рухсатномаларга қатъиян қарши чиқади.
«Мен учун эркинлик ҳамма нарсадан устун. Агар фуқаро эмланишни истамаса, бу унинг ҳуқуқи, тамом-вассалом», — деди президент.
Бразилиянинг 213 миллион аҳолисидан қарийб 100 миллион тўлиқ эмланган, яна 50 миллион биринчи дозани олган.
Болсонару пандемия бошидан буён ниқоб тақишдан бош тортиб ва изоляция чораларига қарши чиқиб келади. У ҳеч қандай коронавирус уни йиқита олмаслигини кўп бора такрорлаган ва касалликни «енгил грипп» деб атаган. Маълумот учун, 2020 йил ёзида у коронавирус билан касалланиб ўтган.
Мавзуга доир: Бразилия президенти эмланганлик сертификати йўқлиги учун Нью-Йорк ресторанларига киритилмади
Путин мутахассислар зарур деб топганида қайта эмланишини билдирди
Россия президенти Владимир Путиннинг қайта эмланиши мутахассислар тавсиясига боғлиқ бўлади, улар буни зарур деб топиши билан, бу жараёндан ўтади.«Ҳаммаси мутахассислар тавсияларига боғлиқ бўлади. Биласиз, президент бунга жуда эътибор билан муносабатда бўлади, мутахассислар қайта эмланиш зарур деган хулосага келиши билан, президент буни амалга оширади », — деди матбуот котиби Дмитрий Песков.
Путин вакцина олганига олти ой тўлди. Аввалроқ унинг ўзи коронавирусга нисбатан антитаналари юқори бўлиб қолаётганини айтганди.
Изоҳ (0)