АҚШ собиқ президенти Билл Клинтон касалхонага ётқизилди, деб хабар бермоқда CNN. Телеканал маълумотларига кўра, Клинтон инфекция туфайли Калифорниядаги тиббий муассасага олиб кетилган, аммо касаллик COVID-19 билан боғлиқ эмас.
Клинтоннинг расмий вакили айтишича, 75 ёшли сиёсатчининг аҳволи яхшиланмоқда, кайфияти ҳам яхши. CNN аниқлик киритишича, касалхонага ётишига қонга инфекция тушиши (сепсис) сабаб бўлган. Клинтон 12 октябрь, сешанба куни соғлиғи ёмонлашгани сабабли касалхонага олиб кетилган.
«У антибиотиклар билан даволанмоқда, шифокорларнинг айтишича, дорилар унга ижобий таъсир қилмоқда» — дейилади хабарда.
Телеканал журналистлари, даволовчи шифокорлар ва собиқ президентнинг вакилларига таяниб, Клинтонга 16 октябрь куни уйга жавоб берилиши мумкинлиги ҳақида хабар қилди. Сиёсатчи бундан олдин икки марта — 2004 ва 2010 йилларда юрак операциясини бошдан ўтказган.
Билл Клинтон — АҚШнинг 42-президенти, унинг номзоди Демократлар партиясидан кўрсатилган. У 1993 йилдан 2001 йилгача кетма-кет икки муддат давлат раҳбари бўлиб ишлаган. Бунгача у беш марта Арканзас штати губернатори этиб сайланганди.
Клинтоннинг рафиқаси Хиллари 2009 йилдан 2013 йилгача АҚШ Давлат котиби бўлган. 2016 йилда у Демократик партиядан президентлик сайловларида қатнашди, лекин республикачи Дональд Трампга ютқазди.
Изоҳ (0)