Норвегияда камон ва найзалар билан қуролланган эркак беш кишини ўлдирди. Бу 13 октябрь куни кечқурун мамлакат жанубида жойлашган ва қарийб 25 минг аҳолиси бўлган Конгсберг шаҳрида юз берди. Жиноятчи шаҳар маркази бўйлаб юриб, ўткинчиларга ҳужум қилган. Полиция фикрича, у ўз қурбонларини тасодифий равишда танлаган. 50—70 ёш оралиғидаги тўрт аёл ва бир эркак ҳалок бўлди. Яна икки киши, жумладан бир полициячи яраланди, уларнинг ҳаёти хавф остида эмас.
Ҳужум қилган шахсни қўлга олишга ярим соат вақт кетди. Полицияга ҳужум ҳақидаги биринчи хабар маҳаллий вақт билан 18:13 да келиб тушган. Беш дақиқадан кейин патруль ходимлари жиноятчини кўриб, уни қўлга олишга уринган, бироқ у полициячиларга қарата ўқ узган ва қочиб кетган, уларда эса қурол бўлмаган. Бир неча дақиқа ўтиб, бу ерга қўшимча қуролланган патруллар юборилди, 18:47 да эса гумонланувчи ушланди. Ҳибсга олишдан аввал полициячилар ҳавога огоҳлантирувчи ўқ узган. Ҳодисадан кейин полициячиларга қуролланиш буюрилди, одатда эса Норвегияда улар қурол олиб юрмайди.
Ҳужум қилган шахс 37 ёшли Дания фуқароси бўлиб чиқди. Полиция ҳозирча унинг исмини ошкор қилмаяпти, аммо шу нарса маълумки, полицияга унинг «радикаллашгани» ҳақида хабарлар келиб тушган. Бундай хабарларнинг сўнггиси 2020 йил санасига тегишли.
VG нашрига кўра, гумонланувчи Норвегияда туғилган ва бутун умр шу ерда яшаб келган. 2000 йиллар бошидан буён у расман ишсиз ҳисобланади. NRK маълумотларига қараганда, у ўғрилик ва наркотиклар сотиб олиш бўйича муқаддам судланган, ярим йил олдинроқ эса ўлдириш билан таҳдид қилган икки қариндошига яқинлашмаслик бўйича суддан тақиқ олган. Баъзи маълумотларга кўра, у бу тақиқни камида бир марта бузган.
Ҳужумчининг мақсади ҳозирча номаълум. 14 октябрь куни эрталаб унинг адвокати гумонланувчи ўз мақсадларини очиб берувчи кўрсатмаларни тақдим этаётганини айтганди, аммо уларнинг моҳиятига аниқлик киритмади. Гумонланувчининг шериклари бўлмаган. Норвегия хавфсизлик полицияси айни пайтда ҳужум теракт сифатида баҳоланаётганини маълум қилди. Муассаса хабарида таъкидланишича, ҳужумдан кўзланган мақсад бўйича янада батафсилроқ маълумотлар тергов жараёнида аниқланади. Мамлакатда террорчилик хавфи «ўртача» даражада қолмоқда.
Конгсбергдаги оммавий қотиллик — қурбонлар сони бўйича Норвегия тарихидаги иккинчиси. Бундан кўпроқ одамлар Андерс Брейвик томонидан амалга оширилган терактда ҳалок бўлган. 2011 йил июлида ўта ўнг қарашларга эга Брейвик Осло марказида бомба портлатиб, сўнг Утойя оролидаги ёшлар лагерида отишма содир этган. Оқибатда 77 киши ҳалок бўлган, уларнинг кўпчилигини ўсмирлар ташкил қилган. Террорчи Норвегияда мумкин бўлган максимал жазо — 21 йиллик қамоққа ҳукм қилинди, агар ҳукумат жамият учун ҳамон хавф туғдиради, деган хулосага келса, муддат узайтирилиши мумкин.
Изоҳ (0)