Пиёда юриш – бу жисмоний машқнинг энг осон ва қулай тури. Юриш инсон саломатлиги учун фойдали бўлибгина қолмай, руҳий-эмоционал ҳолатга ижобий таъсир кўрсатади.
- Асаб тизими – мия фаолияти, ҳаракат ва координацияни яхшилайди, асаб ҳужайралари кислород билан бойитади, тинчлантиради, уйқу меъёрлашади. Депрессия хавфини 30 фоизга, Алсгеймер касаллигини 40 фоизга камайтиради.
- Юрак-қон томирлар тизими – вегитатив асаб тизимининг ҳолатига таъсири орқали қон босимини камайтиради, юрак фаолиятини яхшилайди. Юриш пайтида оёқ мушакларининг ритмик қисқариши ва бўшашиши қон ва лимфа оқимини фаоллаштиради, томирлар кенгайишининг олдини олади.
- Ҳаракат-таянч тизими – метоболизмни оширади, ортиқча калорияни йўқотади ва мушак массаси ортади. Юриш таъсири остида суяк тўқимасининг тикланиш жараёнлари фаоллашади, бу суяк минерал зичлигини ошишига олиб келади. Бўғимлардаги оғриқни камайтиради, ҳаракатчанликни оширади, уларни ўраб турган мушакларни кучайтиради.
- Нафас олиш тизими – ўпка вентеляциясини яхшилайди ва ҳажмини оширади. Кўкрак қафаси мушаклари нафас олиш жараёнига жалб қилингани сабабли ўпканинг экскурсияси кучаяди ва кислород алмашунуви 30 фоизга ошишига олиб келади.
- Овқат ҳазм қилиш тизими – ўт пуфаги ва ичакларнинг тўлқинли ҳаракатларининг ошиши туфайли ўт қопида тош пайдо бўлишини ва қабзиятнинг олдини олади.
- Эндокрин тизими – юрганда мушаклар энергияни ёғларнинг оксидланиши ва углеводларнинг парчаланиши ҳисобига олади. Бу ортиқча вазн йўқотишда самарали таъсир кўрсатади ва қандли диабет касаллигининг олдини олади.
- Мунтазам юриш иммунитетни мустаҳкамлайди.
Ҳар куни ярим ёки бир соат пиёда юриш оптимал ҳисобланади. Муҳими, мунтазамлик. Давомийликни шахсий ҳолатга қараб аста-секин ошириб бориш керак. Юриш охирида одам эркин нафас олиши, енгил, ёқимли чарчоқ ҳолатини ҳис қилиши керак.
Шифокор Хуршид Аъзамхўжаев тавсиялари асосида тайёрланди.
Изоҳ (0)