Рахит – кичик ёшдаги болаларда учрайдиган касаллик бўлиб, организмда кальций ва фосфор алмашинуви бузилиши натижасида келиб чиқади. Кичкинтой ҳаётининг дастлабки йиллари тез ўтади. Суякларнинг тўғри ўсиши учун D витамини организмда кальций ва фосфорнинг ичакдан сўрилиши, суяк ва бошқа тўқималарга етиб боришини бошқаради. D витамини етишмаслиги сабабли рахит касаллиги ривожланади. D витамини оз миқдорда озиқ-овқат билан киради, катта қисми қуёш нурлари таъсирида терида синтезланади.
Аломатлари:
- бола уйқусининг бузилиши;
- эмаётганда кўп терлаши;
- товуш ва ёруғлик нуридан чўчиши;
- тери тошмалари;
- бошининг энса қисмида соч тўкилиши;
- инжиқлик, безовталик.
Суяк юмшашига, мушак ва бўғимлар бўшашиши, иммунитет сустлашиши, камқонлик кузатилади. Бола боши ва гавдасини тўғри тутишга қийналади, лиқилдоғи секин битади. Тишлар чиқиши кечикади. Тез-тез шамоллайди.
Вақтида даволанмаса, бола катталашган сари суяклари қийшиқ ўсиш эҳтимоли ортади. Умуртқа поғонасининг букчайиши, кўкрак қафасини пастга қараб энкайиб қолиши, оёқни «Х» ёки «О» шаклида қийшайиши, ясси оёқлик пайдо бўлади. Ички аъзоларни нотўғри ривожланиши, ақлий заифлик пайдо бўлиши мумкин.
Профилактика:
Ҳомиладорлик даврида
Кунига камида 2 соат тоза ҳавода сайр қилиш, шифокор кўрсатмаси билан кальций препаратларини қабул қилиш мумкин. Қиш мавсумида витаминга бой маҳсулотларни тановул қилиш ва қўшимча D витаминини ичиш лозим.
Туғруқдан кейин
Бола олти ойгача иложи борича фақат она сути билан парвариш қилиниши керак. Эмизиш даврида она витаминли маҳсулотларни истеъмол қилиши лозим. Қўшимча овқатларга ўтилганда, бола таомномасида гўшт, тухум, балиқ каби маҳсулотлар бўлишига аҳамият бериш зарур.
Иложи борича кундузи очиқ ҳавода сайр қилишни унутмаслик лозим. Тадқиқотлар хулосасига кўра, D витамининг етарли дозасини таъминлаш учун кундузи юз, қўл очиқ бўлган ҳолатда ҳар куни ёки камида ҳафтасига уч марта қуёш нурини олиш керак. Бунда тери оқ бўлса, беш дақиқа; буғдойранг бўлса, ярим соат кифоя. Шунингдек, бўғим ва умуртқа поғоналарини ривожлантириш ва мустаҳкамлаш учун гимнастика ва массаж тавсия қилинади.
Шифокор Хуршид Аъзамхўжаев тавсиялари асосида тайёрланди.
Изоҳ (0)