Россия ўзи билан иттифоқдош барча давлатларда рус тилида таълим беришга ихтисослашган мактаблар ташкил этилишидан манфаатдор. Бу ҳақда мамлакат ташқи ишлар вазири Сергей Лавров чет элда яшовчи россиялик ватандошларнинг VII жаҳон конгрессидаги чиқишида маълум қилди, дея хабар бермоқда «РИА Новости».
«Тожикистонда бизнинг методологиямизга асосланган тўлиқ дастур бўйича ўқитадиган бешта рус мактаби ташкил этилмоқда. Ўзбекистон учун ҳам ҳозирда шундай дастур тайёрланмоқда. Арманистоннинг янги раҳбарияти ҳам сўнгги вақтларда Арманистон учун ҳам худди шундай дастур ишлаб чиқишга қизиқиш билдирди», — деди Лавров, рус тилини тарғиб этиш масалаларига тўхталаркан.
Унинг сўзларига кўра, Москва бу дастур барча иттифоқчилар ва стратегик шериклар учун намунавий лойиҳага айланишидан манфаатдор.
Ўзбекистон Халқ таълими вазирлиги матбуот котиби Лайло Рустамованинг «Дарё» сўровига жавобан маълум қилишича, вазирликда айни дамда Ўзбекистонда рус тилида таълим беришга ихтисослашган янги мактабларни очиш бўйича маълумот мавжуд эмас.
Маълумот учун, Ўзбекистонда 2020/2021 ўқув йилида таълим фақат рус тилида олиб бориладиган мактаблар сони 81 тани ташкил этади, уларда 634 985 нафар ўқувчи таълим олади. Таққослаш учун, 2007/2008 ўқув йилида Ўзбекистонда таълим рус тилида олиб бориладиган жами мактаблар сони 739 тани ташкил этиб, уларнинг 613 тасида таълим тили аралаш (ўзбек ва рус тилларида), 126 тасида эса фақат рус тилида бўлган.
Изоҳ (0)