БМТнинг Қочқинлар иши бўйича бошқармаси Афғонистон учун гуманитар ёрдам ортилган 3 та самолётни Термизга юборишни режалаштираётгани тўғрисида хабар берилганди. Бошқарма Twitter’даги саҳифаси орқали 15 октябрь куни биринчи самолёт Термизга келиб қўнганини маълум қилди.
Бирламчи зарурий маҳсулотлар ўрин олган 32 тоннали ушбу гуманитар ёрдам юк машиналарига ортилиб, Термиздан «Ҳайратон» чегара пункти орқали Афғонистоннинг Мозори-Шариф шаҳрига етказилади.
Кобулда бўлиб турган БМТнинг Қочқинлар иши бўйича бошқармаси вакили Бабар Балохнинг маълум қилишича, бошқарма Афғонистон билан чегарадош давлатларда логистик марказларни ташкил этиш устида иш олиб бормоқда. Улар орқали Афғонистондаги 100 минглаб ички кўчманчиларга фавқулодда ёрдам кўрсатилади.
«Кечалари ҳаво совуқлашмоқда ва бошпанасиз қолган одамларга тезкор ёрдам зарур», — деб таъкидлаган Балох. Унинг сўзларига кўра, ёрдамга муҳтож афғонлар сони 20 миллион кишига етди ва кундан кунга ошиб бормоқда.
Шунингдек, у бошқарма юз минглаб фуқароларга фавқулодда ёрдам кўрсатиш учун Афғонистон билан чегарадош мамлакатларда логистика марказларини яратиш устида иш олиб бораётганини маълум қилган.
БМТнинг огоҳлантиришича, бугунги кунда афғон оилаларининг 5 фоизигина нормал егуликлар билан таъминланган. Беш ёшгача бўлган болаларнинг ярмидан кўпи тўйиб овқатланмаяпти.
Аввалроқ БМТ Афғонистонга ёрдам кўрсатиш учун Ўзбекистонда асосий логистика марказини очгани, Ўзбекистон Афғонистонга инсонпарварлик ёрдами юборгани тўғрисида хабар берилганди.
Изоҳ (0)