Safia қандолатчилик уйи асосчиси 27 ёшли Бекзод Самиғжонов Ўзбекистон Президенти Шавкат Мирзиёевга видеомурожаат йўллаб, компаниянинг янги заводини сақлаб қолишда ёрдам сўради. Завод қурилиши учун мўлжалланган ер мамлакат Президентининг топшириғига кўра, Тошкент ҳокимлиги қарори билан ажратилган. Аммо олдинги ижарачи суд орқали ерни ажратиш борасидаги ушбу қарорни ҳақиқий эмас деб топилишига эришган. «Gazeta.uz» мурожаатни матн кўринишида тақдим этди.
Ассалому алайкум, ҳурматли Шавкат Миромонович,Менинг исмим Бекзод Самиғжонов, ёшим 27 да, «Safia қандолатчилик уйи» оилавий корхонасининг асосчиси ҳисобланаман. Ушбу бизнесни бобом 1995 йилда тешиккулча сотиш орқали бошлаган. 2005 йилда онам Мадина Аюпова «Медгородок»да ўзининг биринчи қандолат дўконини очган, уни «Мадинадан уй пишириқлари» деб номланган.
Сизнинг раҳбарлигингиз остида амалга оширилаётган ислоҳотлар сабаб, тадбиркорлар учун жуда кўплаб имкониятлар яратилмоқда. Ўзбекистонда бизнес олиб боришнинг янги йўналишлари очиляпти. Шунингдек, биз ҳам сўнгги беш йил ичида улкан марраларни забт этдик. 2016 йилга қадар ходимларимиз 100 кишини, савдо нуқталаримиз эса 4 тани ташкил этган бўлса, охирги беш йилда 44 та савдо нуқтасини очдик, ходимларимиз сони 2000 кишидан ошди.
Қандолатчилик компаниямиз 500 турдаги маҳсулотларини ишлаб чиқаради ва шуни ишонч билан айта оламанки, Ўзбекистондаги қандолат маҳсулотлари хориждаги муқобилларидан умуман фарқ қилмайди.
Август ойида президент ва тадбиркорлар ўртасида очиқ мулоқот бўлиб ўтди. Ушбу учрашувда юзлаб тадбиркорлар тақдирланди, хусусан, биз ҳам. Компаниямиз энг кўп иш ўрни яратган компания сифатида мукофотга лойиқ кўрилди. Ва ўз нутқингизда бизнинг асосчимиз, онам Мадина Аюпова ҳақида гапириб, уни энг тақинли тадбиркор аёл дея таърифладингиз.
Биз шу қадар хурсанд бўлган эдикки, мен яқин вақтлар ичида 10 минг иш ўрни яратишга ўзимга ўзим ваъда бердим. Кўнглимдаги орзум — президент билан учрашиш эди. 2018 йил 21 декабрь куни Яшнобод туманидаги президентнинг тадбиркорлар билан учрашуви бўлиб ўтди, у ерда мен ҳам бор эдим. Ўшанда мен янги қандолатчилик фабрикаси тақдимотини ўтказдим. Шунда сиз ушбу лойиҳани маъқулладингиз ва ер ажратиш бўйича топшириқ бердингиз. Мен ушбу фарбиканининг тақдимотини шахсан ўзингизга, мутлақо бошқа муҳитда тақдим этмоқчи эдим. Аммо афсуски, шароит вазият бошқача бўлиб қолди.
2019 йилнинг 23 декабрида Тошкент шаҳар ҳокимининг қарори билан бизга 80 сотих ер ажратилган. Шунингдек, ернинг 40 сотихи давлат эҳтиёжлари учун берилган ва бюджет маблағлари ҳисобига спорт мажмуаси қурилган.Шундан сўнг, биз керакли барча ҳужжатларни тўпладик ва қурилишга рухсат олдик. Марказий Осиёда муқобили бўлмаган фабрикани лойиҳалаш учун Латвиядан мутахассислар жалб этдик ва барча халқаро стандартларга жавоб берувчи заводни қурдик.Ушбу ер 2016 йилда Маданият вазирлиги томонидан қурилиш компаниясига ижрага берилган, у узоқ вақт бўш ётган ва ташландиқ ҳолатда бўлган. 2018 йил 10 май куни Учтепа туманига амалга оширган ташрифингиз давомида иқтисодий кўрсаткичларни яхшилаш ва янги иш ўринларини яратиш мақсадида бўш ҳамда сарамасиз фойдаланилаётган ерларни инвесторларга ажратиш бўйича топшириқ берган эдингиз. Ушбу рўйхатда мазкур ер ҳам бор эди. Шундан кейин Вазирлар Маҳкамасининг қарори билан мазкур участка Тошкент шаҳар ер фонди захирасига олинган.
Фойдали майдондан максимал фойдлааниш учун биз 15 минг квадрат метрли уч қаватли завод қурдик. Шунингдек, таъкидлашни хоҳлардимки, узоқ вақт давомида бу ерга чиқиндилар ташлангани сабаб биз 18 метрли чиқиндиларни ковлаб, чиқариб ташлашга мажбур бўлдик. Чиқиндиларни олиб кетишга 15 минг юк машинаси талаб этилди.
Энди энг қизиғи бошланди. Бизга ер ажратилганидан икки йил ўтиб, фабрикамиз қурилиши якунлангач, олдинги ижарачи ҳокимликнинг ерни тортиб олиш ва уни бизга бериш тўғрисидаги қарорини бекор қилиш мақсадида судга берди. Биринчи суд инстанциясида ҳокимлик ютди. Иккинчи аппеляцион судда ҳам ҳокимлик ютиб чиқди. Аммо ажабланарлиси, 2021 йилнинг сентябрь ойида Вазирлар Маҳкамасининг қарори, заводни қуриш учун улкан маблағ кетганига қарамай, Олий суд ҳокимликнинг иккала қарорини ҳам бекор қилиш бўйича қарор чиқарди.Энди мазкур ерни бўшатиб қўйишимиз ва 4 мингта янги иш ўрни яратиши мумкин бўлган янги қурган заводимизни ўз маблағларимиз эвазига бузишни талаб қилиб, қурилишимизни тўхтатиб қўйишди ва судга беришди.
Бугунги кунда Олий суд қарорини бекор қилиш бўйича кассация даъвоси киритганмиз.
Биргина қарор сабаб 25 йиллик меҳнатимиз йўққа чиқмоқда. Сиз доим янги Ўзбекистонда тадбирколар ҳалол ва виждонли бўлса, доим шу каби тадбиркорлар тарафида бўлишингизни айтиб келасиз.
Ҳурматли Шавкат Миромонович, Safia оиламиз номидан бизни ёлғиз қолдирмай, ёрдам беришингизни сўраймиз.
Бекзод Самиғжонов, Safia қандолатчилик уйи асосчиси
Изоҳ (0)