Пандемия даврида Россия ҳудудида қолиб кетган Ўзбекистон фуқароларини ватанга олиб келиш мақсадида «Ўзбекистон темир йўллари» АЖ махсус рейсларни йўлга қўймоқда, деб хабар беради «Ўзтемир йўлйўловчи» АЖ матбуот хизмати.
Маълум қилинишича, Волжский—Тошкент йўналишида 483-сонли йўловчи поездининг 4 та махсус рейси йўлга қўйилади. Мазкур поездлар 2021 йил 22, 25, 29 октябрь ҳамда 1 ноябрь кунлари соат 20:57 да Волжский—Тошкент йўналишида ҳаракатини амалга оширади.
Ушбу поездларга фақат бир томонга, яъни Волжский—Тошкент йўналишига чипталар сотилади. Чипталарни электрон тарзда ҳам сотиш йўлга қўйилган. Россиядаги ўзбекистонликларнинг яқинлари Ўзбекистонда туриб, уларнинг шахсини тасдиқловчи ҳужжати нусхаси билан «E-ticket.railway.uz»дан чипталарни электрон тарзда харид қилиб олиб, жўнатишлари ҳам мумкин.
Қўшимча маълумотларни 1005 қисқа телефон рақами ёки жойлардаги темир йўл кассаларидан олиш мумкин.
Бундан аввал Ўзбекистон Россиядан темир йўл қатновини тиклашни сўрагани, Россияда қолиб кетган ўзбекистонликларни қайтариш учун 2 та махсус поезд рейси қўйилгани тўғрисида хабар берилганди.
Изоҳ (0)