13 октябрь куни Туркия ҳукумати томонидан Ўзбекистонга беғараз ёрдам сифатида COVID-19 га қарши Хитойда ишлаб чиқарилган Sinovac вакцинаси олиб келинди, деб хабар беради ССВ матбуот хизмати.
Маълум қилинишича, Истанбул–Тошкент рейси билан мамлакатга келтирган Sinovac вакцинасининг 200 минг дозаси, шунингдек, 20 минг қути «Фавипиравир» дори препарати Ўзбекистон вакиллари томонидан қабул қилиб олинган.
Ўзбекистон ва Туркия ҳукуматлари ўртасида соғлиқни сақлаш соҳасида грант ёрдамига оид имзоланган битим асосида олиб келинган Sinovac вакцинаси мамлакатга келтирилган олтинчи вакцинадир.
Шундай қилиб, Ўзбекистонга эмлаш жараёнларида фойдаланилаётган жами вакцина 28 673 528 дозани ташкил қилмоқда.
Эслатиб ўтамиз, Ўзбекистонга Хитойнинг коронавирусга қарши Sinovac вакцинаси келтирилиши мумкинлиги ҳақида 2021 йилнинг май ойида Коронавирусга қарши кураш штаби аъзоси Нурмат Отабеков маълум қилганди. «Жаҳон соғлиқни сақлаш ташкилотининг маълумотларига кўра, COVAX дастури доирасида Хитойнинг ‘Синофарм’ фирмасида ишлаб чиқарилган вакцина — Sinovac вакцинаси Ўзбекистонга олиб келиниши эҳтимоли бор», — деган эди у АОКАда ўтказилган брифингда.
Бундан аввал Ўзбекистонга 1,2 миллион дозадан ортиқ Pfizer вакцинаси, Германиядан 356 минг доза AstraZeneca вакцинаси ҳамда 2,5 миллион доза ўзбек-хитой вакцинаси келтирилгани ҳақида хабар берилганди.
Изоҳ (0)