Ижтимоий тармоқларда Андижон давлат тиббиёт институти (АДTИ) ўқитувчилари ва бошқа ходимларининг маошлари ҳашар (шанбалик) учун ушлаб қолинаётгани ҳақида хабарлар тарқалган эди.
7 октябрь куни институт матбуот хизмати хабар беришича, 21 август куни институт ҳудудида умумхалқ хайрия ҳашари ўтказилган, бироқ ходимларнинг иш ҳаққидан ушлаб қолинмаган.
«Ижтимоий тармоқларда тарқатилган маълумотлар асоссиз. Институтнинг бирорта ҳам ходими мажбурий меҳнатга жалб қилинмаган ва уларнинг розилигисиз иш ҳаққидан ушлаб қолинмайди», – дейилади хабарда.
Андижон вилояти Адлия бошқармаси вазиятни ўрганиб чиқиб, институт ректори Мадамин Мадазимовнинг 2021 йил 15 сентябрдаги буйруғида «ходимларнинг иш ҳаққидан ҳашар учун ўз ихтиёри билан ушлаб қолиш» назарда тутилгани айтилган. Бу ҳақда Адлия вазирлиги матбуот хизмати хабар берди.
Ўзбекистон Республикаси Меҳнат кодексининг 164-моддасига мувофиқ, меҳнат ҳаққидан ушлаб қолишга ходимнинг ёзма розилиги билан, бундай розилик бўлмаган тақдирда эса суд қарорига асосан йўл қўйилади.
Бироқ институт ректорининг юқоридаги буйруғига асосан 743 нафар ходимнинг сентябрь ойи учун ойлик иш ҳаққидан 100-300 минг сўмдан жами 150 миллион сўм маблағ август ойида ўтказилган ҳашар муносабати билан ушлаб қолинган бўлиб, шундан 221 нафар ходимнинг иш ҳаққидан уларнинг розилигисиз пул маблағлари ушлаб қолинган.
Ўрганиш натижасида 150 миллион сўм пул маблағи институт ходимларига тўлиқ қайтарилган ҳамда қонун бузилиши ҳолатларига йўл қўйган институтнинг мансабдор шахслари интизомий ва маъмурий жавобгарликка тортилган.
Мавзуга доир:
- Андижонда уйида ободонлаштириш ходимларини ишлатган ҳоким ўринбосари 13,5 млн сўм жаримага тортилди
- Қашқадарёда ўқитувчиларни ободонлаштириш ишларига жалб этган мактаб директори 21,6 млн сўм жаримага тортилди
- Марғилондаги мактабда ўқитувчилар мажбурий меҳнатга жалб этилгани ҳақидаги хабарга муносабат билдирилди
Изоҳ (0)