Россиялик телебошловчи Ксения Собчак ўтирган автомобиль ҳалокатга учради, деб хабар беради «РБК».
«Сочида 9 октябрь, шанба куни иккита автомобиль олд қисми билан тўқнашди. Улардан бирининг йўловчиси Ксения Собчак бўлган. У жабрланмади, ЙТҲдан кейин эса бошқа машинада жўнаб кетди», — дея «Интерфакс»га ўз манбаси маълум қилди.
Унинг сўзларига кўра, авария иштирокчиси бўлган иккинчи машинада уч киши бўлган: улардан бири воқеа жойида ҳалок бўлган, бошқаси касалхонада вафот этган, учинчиси эса оғир аҳволда ётибди. «РЕН ТВ» эса бир нафар қурбон ва икки жабрланувчи ҳақида маълум қилди.
Автоҳалокат 9 октябрь куни кечки пайт содир бўлган, деб ёзади «112» Telegram канали. Унинг маълумотларига кўра, Ксения Собчак йўловчи сифатида ўтирган Mercedes S500 ҳайдовчиси қувиб ўтиш чоғида йўлнинг қарама-қарши йўналишдаги қисмига ўтиб кетган ва Volkswagen автомобили билан тўқнашган. Шундан кейин у отилиб кетиб, микроавтобусга тўқнашган. Оқибатда Volkswagen’нинг йўловчиси ҳалок бўлган, ҳайдовчи ва яна бир йўловчи шикастланган. Микроавтобусда ўн нафар йўловчи бўлган, улар тиббий ёрдам сўраб мурожаат қилмаган.
Telegram-канал манбаларига қараганда, Mercedes S500 да Собчакдан ташқари яна икки йўловчи бўлган, улар жабрланмаган. ЙТҲдан кейин телебошловчи ҳамроҳлари билан таксида аэропортга кетган.
«Подъём» нашри хабар қилишича, Mercedes автомобили Собчакка тегишли бўлмаган, хизмат сафарлари чоғида у доим машиналарни маҳаллий ҳайдовчи билан бирга ижарага олади.
Ксения Собчак ўз Telegram каналига ЙТҲ ҳақида пост жойлади. Телебошловчининг сўзларига кўра, машинадаги ҳеч ким ҳайдовчини тез юришга мажбур қилмаган. Унинг ўзи тўқнашувдан кейин ҳушини йўқотган, мияси чайқалган ва кўп сонли шикастланишлар олган, шу жумладан, ички аъзолари жабрланган. Аммо у «ўғлининг ёнига ва уйига шошгани» сабабли Сочида касалхонага боришдан бош тортган. «Биз бошқа машинада жўнаб кетдик, бироқ ундан аввал менинг директорим Кирилл тез ёрдам чақирди ва бошқа машинадагиларга қандай ёрдам қилишимиз мумкинлигини билиб келди. Уларга ёрдам кўрсатилаётган эди… Одамлар ҳалок бўлганидан шок ҳолатидаман, уларнинг қариндошлари билан боғланамиз», — дейилади постда.
Собчак — телебошловчи ва сиёсатчи, 2018 йилда у Россия президенти сайловида қатнашиб, 1,68 фоиз овоз билан тўртинчи ўринни эгаллаган. 2019 йилдан буён «Эҳтиёт бўлинг, Собчак!» YouTube каналини юритиб, янгиликлар шарҳлари ва таниқли шахслар билан интервьюларни жойлаб боради.