Инсоният тез орада COVID-19 га қарши курашда йўлнинг 60 фоизини босиб ўтади, лекин олдинда кутилмаган тўсиқлар бўлиши мумкин, шунинг учун пандемия айнан қачон тугашини айтишга ҳали эрта. Бу ҳақда Жаҳон соғлиқни сақлаш ташкилоти (ЖССТ) бош илмий ходими Сумя Сваминатан Швейцариянинг SonntagsBlick газетасига берган интервьюсида айтиб ўтди.
Агар биз пандемияни марафонга қиёсласак, инсоният ҳозир қайси босқичда, деган саволга жавоб берар экан, Сваминатан шундай деди: «Умид қиламанки, биз тез орада йўлнинг 60 фоизини босиб ўтамиз. Аммо яна кўплаб тўсиқларни енгишимизга тўғри келиши мумкин».
«Тез орада пандемияни енгамиз деб айтишга эрта, бундай бўлмайди. Бунинг учун жуда кўп нарсалар мавҳум бўлиб қолмоқда, шу жумладан, кутилмаганда коронавируснинг янги вариантлари пайдо бўлиши ҳам», — деди Сваминатан.
ЖССТ илмий ходими, шунингдек, дунёнинг турли мамлакатлари ва минтақаларида аҳолини COVID-19 га қарши эмлаш қамровидаги сезиларли фарққа эътибор қаратди. Унинг сўзларига кўра, баъзи мамлакатларда аҳолининг 70-80 фоизи эмланган, Африкада эса эмлаш даражаси 4 фоизга ҳам етмайди. «Биз бу вазиятга қанчалик жим қараб турсак, коронавируснинг янги вариантлари пайдо бўлиши хавфи шунча ошади», — дея хулоса қилди у.
Сентябрь ойининг охирида, россиялик эпидемиолог Эдуард Шунков ҳамда «Роспотребнадзор» марказий эпидемиология институтининг эпидемиология ва ОИТСнинг олдини олиш бўлими бошлиғи Вадим Покровский коронавирус пандемияси яқин орада тугамаслигини айтганди. Шунковнинг сўзларига кўра, олимлар мутацион салоҳияти юқори бўлган вируслар қандай тарқалишини тушуниб етсагина, пандемия якунининг аниқ вақтини олдиндан айтиш мумкин бўлади. Покровский, ўз навбатида, COVID-19 грипп каби мавсумий хусусиятга эга бўлишини ва вақти-вақти билан баъзи мамлакатларда қайта бошланишини айтиб ўтди.
Изоҳ (0)