Калифорния технологик институти (Caltech) тадқиқотчилари арқон устида юришга, парвоз қилиш ва сноуборд учишга қодир янги роботини намойиш этди. Leonardo номини олган робот хавфли миссияларни бажаришга қодир, деб хабар беради Hi-Tech.Mail.ru.
Калифорния технологик институти Автоном тизимлар ва технология маркази биринчи бор роботни 2019 йилда тақдим этганди, бироқ бундан олдинги модель ҳозиргидек яхши жиҳозланмаган эди. Робот юра олмасди, унинг двигателларидан эса фақат сакрашда фойдаланилган. Leg On Aerial Robotic DrOne (LEONARDO) номини олган янги робот эса баланд бинодан сакрашга ва мувозанатини сақлашга қодир. Муҳандислар роботни яратишга қушларнинг парвози ва юришидан илҳомланган.
Муҳандислар жамоасининг маълум қилишича, мазкур ихтиро ускуналарни бошқа сайёраларда, масалан, Марсда ташиши мумкин. Leonardo’нинг оёқлари енгил металлдан ишланган бўлиб, бу двигателларга тушадиган юкламани камайтиради, шунинг учун у юриш ёки парвозни алмаштира олади.
Робот бўйининг баландлиги 76 сантиметрга тенг бўлиб, оёқларини яхши назорат қила олгани учун мувозанатини ушлай олади. Парвоз вақтида у оддий дрон каби двигателларидан фойдаланади. Leonardo’нинг парраклари юриш ва ҳаракат вақтида унинг тик туришини кафолатлайди.
Аввалроқ Хитойда тиш қўйишга қодир стоматолог-робот, Австралияда эса олма теришга қодир робот яратилгани тўғрисида хабар берилганди.
Изоҳ (0)