Boston Dynamics роботи «ой юриши»ни намойиш этди (видео)

2 октябрь куни Миссури штатидаги Faurot Field стадионида талабалар жамоалари ўртасида футбол мусобақаси ўтказилган бўлиб, унга Boston Dynamics’нинг Спот робот-ити ташриф буюрди. Мусиқий танаффус вақтида Спот яна бир бор ўзининг рақсга тушиш қобилиятини оммага намойиш этган, бу сафар унга Rebels қўллаб-қувватлов жамоаси кўмаклашди, деб хабар беради Hi-Tech.Mail.ru.

Робот-итни турли вазифаларга мослаб дастурлаш мумкин: у нафақат рақсга туша олади, балки ҳудудни қўриқлаши, камера орқали объектларни топиши, инсонларнинг тана ҳароратини ўлчаси, эшикларни очиши ва бошқа кўплаб вазифаларни уддалаши мумкин.

Бу Boston Dynamics роботларининг биринчи бор рақсга тушиши эмас. Робот-итлардан бири Янги йил байрами табригида иштирок этиб, компаниянинг бошқа ихтиролари билан бирга рақсга тушганди.

Маълумот учун, робототехникага ихтисослашган Boston Dynamics компаниясига Марк Райберт ва Массачусетс технологиялар институтининг бир гуруҳ муҳандислари томонидан 1992 йилда асос солинган. 2013 йил охирида компанияни Google сотиб олган, 2017 йилда эса Япониянинг йирик инвестори — SoftBank. 2020 йилда Boston Dynamics саккизта роботлар моделини тақдим этди, хусусан, антроморф Atlas роботини ҳам.

Аввалроқ Boston Dynamics’нинг робот-ити 74,5 минг доллардан сотувга чиққани, у Сингапур боғида одамлар орасидаги оралиқ масофани текширишни бошлагани тўғрисида хабарлар берилганди.