Мбаппега йилига 40 миллион евро маош таклиф қилган «Реал», АПЛнинг энг кўп маош олувчи ўйинчисига айланишни хоҳлаётган Салоҳ ва ақл тиши панд бериб қолган Каземиро. Энг сўнгги спорт янгиликлари

Дунё ва ўзбек спортига оид 6 октябрь кунининг энг муҳим хабарлари дайжести билан танишинг.

Ўзбекистон

Аёллар ўртасидаги Жаҳон чемпионатига Истанбул мезбонлик қилади

AIBA аёллар ўртасидаги 2021 йилги Жаҳон чемпионати Туркиянинг Истанбул шаҳрида ўтказилишини эълон қилди, деб ёзмоқда Миллий олимпия қўмитаси матбуот хизмати.

Қайд этилишича, мусобақа декабрь ойида бўлиб ўтади. Баҳсларнинг аниқ санасига яқин кунлар ичида аниқлик киритилади.

Ушбу Жаҳон чемпионатининг мукофот жамғармаси 2,4 миллион АҚШ долларини ташкил этади. Олтин медал соҳибалари 100 минг, кумуш 50 минг, бронза эгалари эса 25 минг доллардан мукофот пулига эга чиқади.

Эслатиб ўтамиз, эркаклар ўртасидаги Жаҳон чемпионати баҳслари 25 октябрдан 6 ноябргача бўлган муддат ичида Сербиянинг Белград шаҳрида ўтказилади.

Жаҳон

«Барселона»да қишки трансферлар ойнаси учун атиги 20 миллион евро бор

«Барселона» қишки трансферлар ойнасида трансферлар учун атиги 20 миллион евро сарфлай олади. Бу ҳақда Diario Sport хабар бермоқда.

Нашрга кўра, агар қайсидир футболчи клубни тарк этса, бу миқдор ошиши ҳам мумкин. Жамоа ҳужум ва ҳимоя (қанот) чизиғига янги футболчиларни таклиф қилиш устида ишламоқда.

Аввалроқ клубнинг «Манчестер Сити» вингери Раҳим Стерлинг ва «Лейпциг» ярим ҳимоячиси Дани Олmмога жиддий қизиқиш билдираётгани ҳақида хабарлар тарқалган эди.

Терма жамоадан оладиган барча мукофот пулларини хайрияга сарфлайдиган Мбаппе

«ПСЖ» ҳужумчиси Килиан Мбаппе Франция терма жамоасидан оладиган барча мукофот пулларини хайрия ишларига сарфлайди.

Мбаппе тўрт йил давомида умумий ҳисобда 1,5 миллион еврога яқин маблағни хайрия учун сарфлаган, деб ёзади GFFN.

Мбаппе Франция терма жамоасида дебют ўйинини 2017 йилнинг март ойида ўтказган. У «учранглилар» сафида 49 ўйинда 17 та гол урган ва 2018 йилги Жаҳон Чемпионати ғолиби бўлган.

Ақл тиши панд бериб қолган Каземиро

«Реал» ярим ҳимоячиси Каземиро ЖЧ—2022 саралаши доирасида Бразилия терма жамоасининг октябрь ойидаги ўйинларини ўтказиб юборади.

Мамлакат футбол конфедерациясининг ёзишича, 29 ёшли футболчи ақл тишининг яллиғланиши туфайли Мадридда қолишга мажбур бўлган. Ярим ҳимоячи камида беш кун давомида машғулотларда қатнаша олмайди, шифокорлар унга дам олишни тавсия этган.

Бразилия 8 октябрь санасида Венесуэла, 11 октябрда Колумбия, 15 октябрда эса Уругвай билан ўйин ўтказади.

Маошининг кўтарилишини хоҳлаётган Салоҳ

«Ливерпуль» вингери Муҳаммад Салоҳнинг янги шартномага кўра қанча маош олишни хоҳлаётгани маълум бўлди.

The Independent хабарига кўра, 29 ёшли мисрлик футболчи ҳафтасига 300—380 минг фунт олишни хоҳламоқда. Қайд этиш керак, Салоҳ бу орқали Англия Премьер Лигасининг энг кўп маош олувчи футболчиларидан бирига айланади.

Салоҳ ҳозирда «Ливерпуль» билан 2023 йилгача амал қиладиган шартномасига кўра, ҳафтасига 200 минг фунт маош олади.

«Реал» Мбаппега йилига 40 миллион евро маош таклиф қилди

«Реал Мадрид» «ПСЖ» ҳужумчиси Килиан Мбаппега 6 йиллик шартнома таклиф қилди, футболчининг йиллик маоши эса йилига 40 миллион еврога яқин бўлади.

Журналист Николо Скиранинг хабар қилишича, Мадрид клуби мавсум охирига бориб, 22 ёшли футболчини эркин агент сифатида қўлга киритишига ишонмоқда.

Бироқ «ПСЖ» ҳам Мбаппени ўз сафида ушлаб қолмоқчи ва у билан янги шартнома имзолаш устида ишламоқда. Томонларнинг амалдаги келишуви 2022 йилнинг 30 июнь санасида ўз ниҳоясига етади.