Жиззах вилоятида Cobalt автомобили ва автобус иштирокида содир бўлган йўл-транспорт ҳодисаси оқибатида икки нафар йўловчи ҳалок бўлди. Бу ҳақда вилояти ИИБ ЙҲХБ ахборот хизмати хабар берди.
Кадр: Telegram
Маълум қилинишича, 5 октябрь куни соат 05:00 ларда Шароф Рашидов тумани ҳудудидан ўтган халқаро аҳамиятга эга М39 автомобиль йўлининг 974-километрида 39 ёшли нукуслик фуқаро Cobalt’ни бошқариб кетаётиб, шу йўналишда ўзидан олдидан ҳаракатланиб кетаётган Yutong автобусининг орқа қисмига бориб урилган.
Йўл-транспорт ҳодисаси оқибатида Cobalt ҳайдовчиси ўнг қовурғалари синиши ташхиси билан Республика шошилинч тиббий ёрдам илмий маркази Жиззах филиалига ётқизилган. Машина ичида бўлган икки нафар йўловчи оғир тан жароҳатлари билан воқеа жойида вафот этган.
Дастлабки суриштирув давомида ушбу ЙТҲнинг келиб чиқишига Cobalt автомашинаси белгиланган тезлик меъёрларига амал қилмагани ва ҳайдовчининг рул бошқарувида ухлаб қолиши сабаб бўлган.
Аввалроқ Сирдарёда юк машинасига бориб урилган «Жигули» ҳайдовчиси воқеа жойида ҳалок бўлгани, Қаршида содир бўлган ЙТҲда 24 ёшли ИИБ ходими вафот этгани, Жиззахда Hyundai юк машинаси ва «КамАЗ» иштирокида ЙТҲ содир бўлгани тўғрисида хабар берилганди.
