Jizzax viloyatida Cobalt avtomobili va avtobus ishtirokida sodir bo‘lgan yo‘l-transport hodisasi oqibatida ikki nafar yo‘lovchi halok bo‘ldi. Bu haqda viloyati IIB YHXB axborot xizmati xabar berdi.
Ma’lum qilinishicha, 5-oktabr kuni soat 05:00 larda Sharof Rashidov tumani hududidan o‘tgan xalqaro ahamiyatga ega M39 avtomobil yo‘lining 974-kilometrida 39 yoshli nukuslik fuqaro Cobalt’ni boshqarib ketayotib, shu yo‘nalishda o‘zidan oldidan harakatlanib ketayotgan Yutong avtobusining orqa qismiga borib urilgan.
Yo‘l-transport hodisasi oqibatida Cobalt haydovchisi o‘ng qovurg‘alari sinishi tashxisi bilan Respublika shoshilinch tibbiy yordam ilmiy markazi Jizzax filialiga yotqizilgan. Mashina ichida bo‘lgan ikki nafar yo‘lovchi og‘ir tan jarohatlari bilan voqea joyida vafot etgan.
Dastlabki surishtiruv davomida ushbu YTHning kelib chiqishiga Cobalt avtomashinasi belgilangan tezlik me’yorlariga amal qilmagani va haydovchining rul boshqaruvida uxlab qolishi sabab bo‘lgan.
Avvalroq Sirdaryoda yuk mashinasiga borib urilgan “Jiguli” haydovchisi voqea joyida halok bo‘lgani, Qarshida sodir bo‘lgan YTHda 24 yoshli IIB xodimi vafot etgani, Jizzaxda Hyundai yuk mashinasi va “KamAZ” ishtirokida YTH sodir bo‘lgani to‘g‘risida xabar berilgandi.
Izoh (0)