Наманган шаҳрида содир бўлган йўл-транспорт ҳодисаси оқибатида вояга етмаган шахс ҳалок бўлди. Бу ҳақда вилоят ИИБ ахборот хизмати хабар берди.
Маълум қилинишича, 29 сентябрь куни соат 17:00 ларда шаҳарнинг «Яккасада» МФЙ ҳудудида Янгиқўрғон туманида яшовчи 34 ёшли фуқаро ўзи ишловчи МЧЖга тегишли Isuzu юк автомашинасини бошқариб бораётиб, ҳаракат хавфсизлигини таъминлай олмай, йўл четида турган пиёдани уриб юборган.
Жабрланувчи Чортоқ туманида ота-онаси қарамоғида яшаган 6 ёшли бола бўлиб, у олган тан жароҳатлари оқибатида воқеа жойида вафот этган.
Ҳолат бўйича Наманган шаҳар ИИО ФМБ ҳузуридаги Тергов бўлими томонидан 29 сентябрь куни Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган.
Аввалроқ Тошкентда 4 нафар мактаб ўқувчисини Damas уриб юборгани, Сурхондарёда йўлни кесиб ўтаётган 7 ёшли қизчани Nexia-3 туртиб кетиши оқибатида жабрланувчи ҳалок бўлгани тўғрисида хабар берилганди.
Изоҳ (0)