Jizzax viloyatining Paxtakor tumanida Hyundai yuk mashinasi tirkamasida yuk avtomobili olib ketayotgan “KamAZ”ga borib urilishi oqibatida haydovchilardan biri halok bo‘ldi. Bu haqda viloyat YHXB matbuot xizmati xabar berdi.

Foto: Videodan kadr

Qayd etilishicha, voqea 20-sentabr kuni soat 00:55 lar atrofida Paxtakor tumani M-39 Toshkent—Termiz avtomobil yo‘lining 957-kilometrida yuz bergan. Haydovchi “KamAZ-5410” yuk mashinasini boshqarib ketayotib, belgilangan joydan qayrilayotgan vaqtida o‘sha yo‘nalish bo‘yicha harakatlanib kelayotgan Hyundai yuk mashinasi “KamAZ”ning yon qismiga kelib urilgan.

Oqibatda Hyundai yuk mashinasining 25 yoshli haydovchisi olgan tan jarohatlaridan voqea joyida halok bo‘lgan.

Xabarda qayd etilishicha, ushbu YTHga Hyundai haydovchisining charchoq alomatlari bilan rulga o‘tirgani sabab bo‘lgan.