Бердимуҳамедов Тошкентдан қайтгач, Ашхободдаги тунги ёритиш тизимларига алоҳида эътибор қаратишни буюрди
Расмий ташриф билан Тошкентда бўлган Туркманистон президенти Гурбангули Бердимуҳамедов 5 октябрь куни Ашхободга қайтди. «Хроника Туркменистана» хабарига кўра, Ашхобод аэропортида давлат раҳбари «аэропорт ҳудуди ва унинг атрофини ёритишнинг алоҳида хусусиятлари»га эътибор қаратган. Унинг сўзларига кўра, «пойтахтнинг асл дизайн элементи — тунги ёруғлик, бу унга ўзига хос жозиба бағишлайди».
Бердимуҳамедов шаҳарнинг ҳар бир бурчаги, хусусан, турли мақсаддаги объектлар тегишли ёритиш тизимлари билан жиҳозланиши кераклигини таъкидлади. Кўрсатмалар қурилиш, саноат ва энергетика мажмуаси учун масъул бўлган бош вазир ўринбосари Чаримурод Пурчековга юборилган.
«Ҳам пойтахтда, ҳам бутун мамлакат бўйлаб бино ва иншоотларга, шу жумладан, йўл -транспорт инфратузилмасига, уларни ёритиш элементларини лойиҳалашга катта эътибор берилиши зарур», — деди президент.
Туркманистон раҳбари сўнгги йилларда Ашхободнинг тунги панорамасида «шаҳарга ўзига хос кўрк берадиган инновацион технологиялар ва рақамли тизимлар» фаол ишлатилганини таъкидлаб ўтди. Шу муносабат билан Гурбангули Бердимуҳамедов «Ашхобод дизайнига комплекс ёндашиш, турли хил ёритиш ечимлари орқали ўзига хос палитра яратиш» бўйича кўрсатма берди.
Февраль ойида пойтахтни кўздан кечириш чоғида президент шаҳарнинг ёритилишидан норози бўлган. «Йўлларнинг айрим участкалари ёритилмаган, уйларда электр узилиши ҳолатлари мавжуд», — деган эди ўша пайтда давлат раҳбари.
Бироқ июнь ойида «кондиционерлар ва совутиш қурилмаларидан фойдаланишнинг ортиши, натижада, электр энергияси истеъмолининг ўсиши ҳисобига кўча ёритгичлари ва реклама устунларида электрни тежашга тўғри келган».
Эслатиб ўтамиз, Ўзбекистон Президенти Шавкат Мирзиёевнинг таклифига биноан Туркманистон президенти Гурбангули Бердимуҳамедов 4 октябрь куни расмий ташриф билан Ўзбекистонга келганди. 5 октябрь куни Кўксарой қароргоҳида Туркманистон президентини расмий кутиб олиш маросими бўлиб ўтган. Шавкат Мирзиёев ва Гурбангули Бердимуҳамедов ўртасидаги тор доирадаги ва кенгайтирилган таркибдаги музокаралар якунлангач, икки давлат раҳбари 23 та ҳужжатни имзолаган. 5 октябрь куни Гурбангули Бердимуҳамедов давлат раҳбари Шавкат Мирзиёев ҳамроҳлигида Тошкентдаги Ислом Каримов номидаги илмий-маърифий ёдгорлик мажмуасига бориб, Биринчи Президент ҳайкали пойига гул қўйган. Ўша куни Тошкент халқаро аэропортида Шавкат Мирзиёев Гурбангули Бердимуҳамедовни кузатиб қўйди.
