Экологик партия Сурхондарёда Қизил китобга киритилган ва Ўзбекистонда 16 тагина қолгани айтилган сиртлон (ёлдор бўри) ўлдирилгани тўғрисида тарқалган хабарлар бўйича маълумот берди.
Маълум қилинишича, ҳолат юзасидан Узун туман Экология ва атроф-муҳитни муҳофаза қилиш инспекцияси ва туман ИИБ томонидан ўрганиш ишлари олиб борилган.
Суриштирув давомида Узун тумани «Мустақиллик» маҳалласида яшовчи фуқаро П.О. овчилик қилиш учун қуроли йўқлиги ва овчилик уюшмасига аъзо эмаслиги аниқланиб, фуқаро 2021 йилнинг февраль ойида туманнинг «Хурсанд» маҳалласи ҳудудидаги фермер хўжалигига қарашли ер майдонида қўйларини боқиб келган. Ярим тунда сиртлон чўпоннинг қўйларига ҳужум қилган, 5 та ит қўйларни ҳимоя қилиш мақсадида гиенага жароҳат етказган. Орттирилган жароҳатлар сиртлоннинг ўлимига сабаб бўлган. Ўлдирилган ҳайвон эртаси куни чўпонлар томонидан суратга туширилган.
«Ўзбекистон Экологик партияси ёввойи ҳайвонларни овлаш ва уларнинг ўлимига сабаб бўладиган ҳар қандай ҳаракатларни кескин қоралайди. Она табиатнинг ажралмас қисми бўлган ноёб ва камайиб бораётган ҳайвонларни ҳар томонлама муҳофаза қилиш, ҳайвонот дунёсига нисбатан эҳтиёткорона муносабатда бўлиш ва қонун талабларига сўзсиз риоя қилишга чақиради», — дейилади хабарда.
Эслатиб ўтамиз, май ўрталарида Тошкент вилоятида россиялик овчи Ўзбекистон Қизил китобига киритилган Тяньшань қўнғир айиғини Экология қўмитаси раҳбари рухсати билан отиб ўлдиргани маҳаллий жамоатчиликнинг кенг муҳокамаларига сабаб бўлган эди. Унда яна битта Тяншан қўнғир айиғини отишга рухсатнома бор эди. Кейинчалик Экология ва атроф-муҳитни муҳофаза қилиш давлат қўмитаси вакили жамоатчилик эътирози инобатга олиниб, овчига иккинчи айиқни отишга рухсат берилмаслигини маълум қилганди.
Изоҳ (0)