Ekologik partiya Surxondaryoda Qizil kitobga kiritilgan va O‘zbekistonda 16 tagina qolgani aytilgan sirtlon (yoldor bo‘ri) o‘ldirilgani to‘g‘risida tarqalgan xabarlar bo‘yicha ma’lumot berdi.
Ma’lum qilinishicha, holat yuzasidan Uzun tuman Ekologiya va atrof-muhitni muhofaza qilish inspeksiyasi va tuman IIB tomonidan o‘rganish ishlari olib borilgan.
Surishtiruv davomida Uzun tumani “Mustaqillik” mahallasida yashovchi fuqaro P.O. ovchilik qilish uchun quroli yo‘qligi va ovchilik uyushmasiga a’zo emasligi aniqlanib, fuqaro 2021-yilning fevral oyida tumanning “Xursand” mahallasi hududidagi fermer xo‘jaligiga qarashli yer maydonida qo‘ylarini boqib kelgan. Yarim tunda sirtlon cho‘ponning qo‘ylariga hujum qilgan, 5 ta it qo‘ylarni himoya qilish maqsadida giyenaga jarohat yetkazgan. Orttirilgan jarohatlar sirtlonning o‘limiga sabab bo‘lgan. O‘ldirilgan hayvon ertasi kuni cho‘ponlar tomonidan suratga tushirilgan.
“O‘zbekiston Ekologik partiyasi yovvoyi hayvonlarni ovlash va ularning o‘limiga sabab bo‘ladigan har qanday harakatlarni keskin qoralaydi. Ona tabiatning ajralmas qismi bo‘lgan noyob va kamayib borayotgan hayvonlarni har tomonlama muhofaza qilish, hayvonot dunyosiga nisbatan ehtiyotkorona munosabatda bo‘lish va qonun talablariga so‘zsiz rioya qilishga chaqiradi”, — deyiladi xabarda.
Eslatib o‘tamiz, may o‘rtalarida Toshkent viloyatida rossiyalik ovchi O‘zbekiston Qizil kitobiga kiritilgan Tyanshan qo‘ng‘ir ayig‘ini Ekologiya qo‘mitasi rahbari ruxsati bilan otib o‘ldirgani mahalliy jamoatchilikning keng muhokamalariga sabab bo‘lgan edi. Unda yana bitta Tyanshan qo‘ng‘ir ayig‘ini otishga ruxsatnoma bor edi. Keyinchalik Ekologiya va atrof-muhitni muhofaza qilish davlat qo‘mitasi vakili jamoatchilik e’tirozi inobatga olinib, ovchiga ikkinchi ayiqni otishga ruxsat berilmasligini ma’lum qilgandi.
Izoh (0)