Тошкентда ЙПХ ходимини ҳақорат қилгани учун қўлга олингани айтилган таниқли автоблогер 15 суткага қамалди (видео)

Ижтимоий тармоқларда Бобур Ғаниев номи билан танилган блогер Учтепа тумани ИИО ФМБ ходимлари томонидан ушлангани тўғрисида хабар берилганди. Тошкент шаҳар ИИББнинг маълум қилишича, автоблогерга 15 сутка маъмурий қамоқ жазоси тайинланган.

Маълум қилинишича, 30 сентябрь кун соат 23:30 ларда Учтепа тумани «Фарҳод» бозори рўпарасида ўтказилаётган «Хавфсиз пойтахт» профилактик тадбири давомида Тошкент шаҳар ИИББ ЙҲХБ ЙПХ инспекторлари томонидан Epica русумли автомашина тўхтатилган.

Транспорт воситаси ҳайдовчиси 1993 йилда туғилган Аброр Козубаевнинг ҳужжатлари текширилган. Шу жараёнда Epica русумли автомашинада йўловчи сифатида ўтирган 1987 йилда туғилган Бобур Ғаниев (интернетда ЙПХ ходимларини танқид қилган видеолари билан танилган) ЙПХ инспекторларини ҳақорат қилиб, жанжал кўтарган. ИИО ходимларининг қонуний талабларига бўйсунмасдан жамоат тартибини бузган.

Шундан сўнг транспорт воситасининг ҳайдовчиси, йўловчилари Бобур Ғаниев ва Обит Салимов Учтепа тумани ИИО ФМБга олиб борилган. Ҳолат юзасидан ҳужжатларни расмийлаштириш ва текширув ўтказиш жараёнида Бобур Ғаниевнинг шахсий уяли телефон аппаратида порнографик мазмундаги, қонунда тақиқланган видеоматериаллар ва фотосуратлар борлиги аниқланган.

Тошкент шаҳар ИИББ ижтимоий тармоқларда Бобур Ғаниевга нисбатан куч ишлатилгани тўғрисида тарқалган хабарларга ҳам тўхталиб ўтиб, аслида бундай эмаслигини таъкидлаган. Блогернинг ўзи ҳам қонунбузарлик содир этганини тан олган.

Юз берган ҳолат бўйича тўпланган ҳужжатлар Жиноят ишлари бўйича Учтепа туман судига тақдим этилган. Унга кўра, Бобур Ғаниев Маъмурий жавогарлик тўғрисидаги кодекснинг 41-моддасида кўрсатилган ҳуқуқбузарликни содир этгани учун (ҳақорат қилиш) БҲМнинг 20 баробари (5,4 миллион сўм), 194-модда (ички ишлар органлари ходимининг қонуний талабларини бажармаслик) бўйича БҲМнинг 1 баравари (270 минг сўм), 195-модда (ички ишлар органлари ходимларининг ўз хизмат бурчларини бажаришларига қаршилик кўрсатиш) бўйича эса 15 сутка маъмурий қамоқ жазоси белгиланган. Бундан ташқари, Epica ҳайдовчиси ва яна бир йўловчига ҳам тегишлича жазо тайинланган.

Шунингдек, Бобур Ғаниевнинг телефонида аниқланган порнографик маълумотлар тарқатилган ёки тарқатилмаганини текшириш мақсадида экспертиза белгиланган.

Аввалроқ Тошкентда пиёдалар йўлагидан ўтиш вақтида телефонда гаплашган блогерга чора кўрмаган ЙПХ ходимларига интизомий жазо белгиланган эди.