Туркманистон президенти Гурбангули Бердимуҳамедов 4—5 октябрь кунлари расмий ташриф билан Ўзбекистонга келади. Бу ҳақда «Туркманистон сегодня» нашри хабар берди.
Маълум қилинишича, 1 октябрь куни Гурбангули Бердимуҳамедов тақамли тизим бўйича Вазирлар Маҳкамасининг навбатдаги йиғилишини ўтказиб, унда миллий иқтисодиётни ҳар томонлама ривожлантиришга қаратилган қатор ҳужжатлар лойиҳалари кўриб чиқилган.
Туркманистон Вазирлар Маҳкамаси раисининг ўринбосари, ташқи ишлар вазири Мередов Гурбангули Бердимуҳамедовга унинг 4—5 октябрь кунлари Ўзбекистонга амалга оширадиган расмий таширифига тайёргарлик бўйича ҳисобот берган.
Туркманистон президенти сўнгги марта Ўзбекистонга 2019 йил ноябрь ойида ташриф буюрган. 2021 йилнинг август ойида икки давлат раҳбари Каспий денгизи соҳилидаги Аваза миллий сайёҳлик зонасида Марказий Осиё давлатлари президентларининг учинчи маслаҳат учрашуви доирасида учрашганди.
Учрашувда аввал эришилган келишувларнинг бажарилиш ҳолати кўриб чиқилди. Ижобий ўсиш суръатларни давом эттириш учун янги лойиҳалар ишлаб чиқиш, чегарадош ҳудудлар ва ишбилармонлар ўртасидаги алоқаларни фаоллаштириш кераклиги таъкидланди. Транспорт-логистика инфратузилмасини ривожлантириш, Жанубий Осиё ва Жанубий Кавказ йўлаклари орқали янги ташқи бозорларга чиқиш, шу жумладан, Ашхобод битимига мувофиқ халқаро транспорт ва транзит йўлагини яратиш истиқболлари муҳокама қилинган.
Учрашувдан сўнг Шавкат Мирзиёев Гурбангули Бердимуҳамедовни ўзи учун қулай вақтда расмий ташриф билан Ўзбекистонга келишни таклиф этган.
Изоҳ (0)