Наманган туманида жойлашган автомобилларга газ тўлдириш компрессор шохобчаларидан бирида ёнғин содир бўлди, деб хабар беради вилоят ФВБ матбуот хизмати.
Маълум қилинишича, 2 октябрь куни соат 00:13 да Наманган тумани ФВБга тумандаги «Қурама» МФЙ Қорасув кўчасидаги автомобилларга газ тўлдириш компрессор шохобчасида ёнғин содир бўлаётгани тўғрисида маълумот келиб тушган.
Зудлик билан қутқарувчилар воқеа жойига соат 00:25 да етиб боришиб, ёнғинни 00:27 да қуршаб олган. Содир бўлган ёнғин 00:45 да ўчирилган.
Ёнғин оқибатида шохобчанинг биринчи газ қуйиш ускунаси ва шифт қисмида 40 квадрат метр жойи ёниб, зарарланган. Ҳодиса натижасида тан жароҳати олганлар ёки ҳалок бўлганлар йўқ.
Ҳозирда содир бўлган ёнғин юзасидан терговга қадар суриштирув ишлари олиб борилмоқда.
Аввалроқ Самарқандда «ЗИЛ» кабинаси ёниб кетгани, Бухорода тўхтаб турган Cobalt’да ёнғин чиққани, Қашқадарёда ҳаракатланаётган Damas қисқа туташув сабаб ёниб кетгани тўғрисида хабар берилганди.
Изоҳ (0)