Тошкентда банкоматни бузиб, ичидан 165 млн сўм ўғирлаган 24 ёшли шахс қўлга олинди

Тошкентдаги банкоматлардан бирини бузиб, унинг ичидан 165 миллион сўм ўғирлаган 24 ёшли шахс қўлга олинди, деб хабар беради Тошкент шаҳар ИИББ ахборот хизмати.

Маълум қилинишича, 18 сентябрь куни соат 01:00 ларда номаълум шахс «Авиасозлар» даҳасидаги банкоматлардан бирини бузиб, унда бўлган пулларни ўғирлаб кетган.

Ҳуқуқ-тартибот органлари ходимлари ушбу шахсни эртаси куни ушлашга муваффақ бўлган. Аниқланишича, қўлга олинган шахс бунга қадар бир неча бор судланган. Унинг уйида ўтказилган тинтувлар давомида 73 миллион сўм топилган, қолган пулларни у ўз эҳтиёжлари учун ишлатиб юборган.

«Кечқурун ичдим ва кўчага чиқдим. Банкомат кўрдим, унда пул борлигини билардим. Машинамда иккита пичоқ бор эди, очадимикан ёки йўқ дея пичоқни тиқдим. Очилди, иккита ‘ячейка’ турган экан, олиб кетдим…», — дейди гумонланувчи.

Ҳолат юзасидан Яшнобод тумани ИИО ФМБ ҳузуридаги Тергов бўлими томонидан Жиноят кодексининг 169-моддаси (ўғирлик) билан жиноят иши қўзғатилган ва айбланувчига нисбатан «қамоққа олиш» эҳтиёт чораси қўлланилган.

Аввалроқ Тошкентда 21 ёшли йигит банкоматни бузиб, пулларни ўғирламоқчи бўлганида қўлга тушгани тўғрисида хабар берилганди.